ހައްޖުގައި ތިބޭ މުއްދަތު ކުރުކޮށްލި ކަމަށް ބުނާ ވާހަކައަކީ ދޮގެއް: ޝަހީމް

ހައްޖުގައި ތިބޭ މުއްދަތު ސަރުކާރުން ކުރުކޮށްލި ކަމަށް ބުނާ ވާހަކަ ދޮގު ކޮށްފި އެވެ.

ރާއްޖެއިން މިއަހަރު ހައްޖުގެ މަތިވެރި އަޅުކަމަށް މީހުން ގެންދާ މުއްދަތު 15 ދުވަހަށް ކުޑަ ކޮށްފައިވާ ކަމުގެ އަޑުތަކެއް ވަނީ ފެތުރިފަ އެވެ.

މިކަމާ ގުޅުވައިގެން އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވީ ހައްޖުގައި ތިބޭ މުއްދަތު ސަރުކާރުން 15 ދުވަހަށް ކުރުކޮށްލި ކަމަށް ބުނެ ދައްކަމުންދާ ވާހަކަ އަކީ ހަގީގަތާ ހިލާފު ވާހަކައެއް ކަމަށެވެ. އަދި 15 ދުވަހު ތިބޭ އެއްވެސް ބަޔަކު ނުތިބޭނެ ކަމަށް ހައްޖު ކޯޕަރޭޝަނުން އެ މަނިކުފާނަށް މައުލޫމާތު ދީފައިވާ ކަމަށް ވެސް ވިދާޅުވި އެވެ.

އިތުރަށް ސާފު ކޮށްދެއްވަމުން ޝަހީމް ވިދާޅުވީ، އެއް ފްލައިޓުގައި އައި މީހުން 18 ދުވަސް، އަދި އަނެއް 3 ފްލައިޓުގެ މީހުން 19 ދުވަހު ތިބޭނެ ކަމަށެވެ. ހައްޖަށްދާ މީހުން މީގެ އަހަރު ތަކެއް ކުރިން 30 ދުވަހު ތިބޭ ކަމަށް ވެސް އެމަނިކުފާނު ވިދާޅުވި އެވެ. ނަމަވެސް މި ފަހު އަހަރު ތަކުގައި އާންމުކޮށް ހޭދަ ކުރަނީ 22 އާއި 25 ދުވަހާ ދެމެދު މުއްދަތެއްކަން ފާހަގަ ކުރައްވާ އެ މަނިކުފާނު ވިދާޅުވީ އެއީ ހައްޖު ނިންމާފައި މަދީނާއަށް އައިސް މައްކާއަށް އެނބުރިދާ ދާތީވެ ކަމަށެވެ.

"ނަމަވެސް މި ފަހަރު ހައްޖު ނިންމާފަ މަދީނާއަށް އައިސް މައްކާއަށް އެނބުރި ނުގޮސް ރާއްޖެއަށް ފުރާ ގޮތަށް ހަމަޖައްސާފައި ވަނީ ހައްޖުވެރީންގެ ރައްކާތެރި ކަމާއި މަސްލަހަތާއި މޫސުމަށް ބަލައި ސިއްހަތަށް ބެލުމުގެ ގޮތުން ސައޫދީ އަރަބިއްޔާއިން ދެއްވަމުން ގެންދަވާ އިރުޝާދުތަކަށް ރިއާޔަތް ކުރުމުގެ ގޮތުން،" ޝަހީމް ވިދާޅުވި އެވެ.

މިނިސްޓަރު ޝަހީމް ވަނީ ގައުމީ މިފަދަ ކަން ކަންކަމުގައި ހަގީގަތް އޮޅޭ ގޮތައް ވާހަކަ ނުދެއްކުމަށް އިލްތިމާސް ކުރައްވާފަ އެވެ. އަދި ރައްޔިތުންގެ ކަންބޮޑުވުން އޮތް ކަމެއް ނަމަ އެކަމާ މެދު މަޝްވަރާ ކޮށްގެން ހައްލެއް ހޯދާނެ ކަމުގެ ފުރިހަމަ ޔަގީންކަން ވެސް އެމަނިކުފާނު ދެއްވާފައިވެ އެވެ.