ފުލުހުންގެ "ރައްކާ" ކެންޕޭންގައި އެމްޓީސީސީން އެއްބާލުން ދެނީ

ފުލުހުންގެ "ރައްކާ" ކެންޕޭންގައި އެމްޓީސީސީން އެއްބާލުން ދިނުމަށް އެއްބަސްވުން: ފޮޓޯ/ އެމްޓީސީސީ

މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ފުލުހުން ކުރިއަށް ގެންދާ "ރައްކާ ކެންޕެއިން"ގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އިން އެއްބާރުލުން ދިނުމަށް އެއްބަސްވުމެއްގައި މިއަދު ސޮއިކޮށްފި އެވެ.

އިސްކަންދަރުކޮށީގައި ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރު ޑީސީޕީ (ރިޓަޔާޑް) އަހުމަދު ސައުދީ އެވެ. ފުލުހުންގެ އިދާރާއިން ސޮއިކުރެއްވީ ޑެޕިއުޓީ ކޮމިޝަނާ އޮފް ޕޮލިސް (ޑީސީޕީ) އިސްމާއީލް ނަވީން އެވެ.

އެމްޓީސީސީން ބުނީ މި ޕްރޮގްރާމުގެ ތެރެއިން، އެ ކުންފުނީގެ ފަރާތުން މަސައްކަތް ކުރާނީ މުޖުތަމައު ތެރޭގައި އުޅޭއިރު ޓްރެފިކް ގަވާއިދުތަކާއި ގާނޫނު ތަކަށް އިހުތިރާމު ކުރުމާއި އެކަމުގެ މުހިންމުކަން އިތުރަށް އަންގައިދީ އޮޅުންފިލުވައިދިނުމަށް ކަމަށެވެ. އަދި ފުލުހުންނާ ގުޅިގެން މި ކެންޕެއިންގެ ތެރެއިން އެކި އުމުރުފުރައިގެ މީހުންނަށް މަގުމަތީގެ ސަލާމަތާއި ރައްކާތެރިކަމާ ގުޅޭ ގޮތުން މުހިންމު މައުލޫމާތު ފޯރުކޮށްދޭނެ ކަމަށް ވެސް އެމްޓީސީސީން ބުނެ އެވެ.

ފުލުހުން ކުރިއަށްގެންދާ "ރައްކާ ކެންޕެއިން"ގެ މައިގަނޑު މަގުސަދަކީ މަގުމަތީގެ ސަލާމަތާއި ރައްކާތެރިކަން ކަށަވަރުކޮށް، މަގުމަތީގައި ހިނގައި އެކްސިޑެންޓު ތަކުގެ އަދަދު މަދު ކުރުމެވެ. މި ކެންޕެއިންގައި ބައެއް ކުންފުނިތަކުން އަންނަނީ ބައިވެރިވަމުންނެވެ.

އެމްޓީސީސީ