މާލެ ސަރަހައްދުގެ 4 ތަނެއްގައި އަދި އިތުރު 24 މިސްކިތެއްގައި އީދު ނަމާދު ކުރާނެ

މިދިޔަ އަހަރު ބޮޑު ޖަމާއަތުގައި އީދު ނަމާދު ކުރުން: ފޮޓޯ/ ހަތާވީސް

މިއަހަރުގެ އަޟްހާ އީދު ނަމާދު، މާލެ ސަރަހައްދުގެ 4 ތަނެއްގައި އަދި މާލެއާއި ވިލިމާލޭގެ އިތުރުން ހުޅުމާލޭގެ 24 މިސްކިތެއްގައި ކުރާނެ ކަމަށް އިސްލާމިކް މިނިސްޓްރީން ބުނެފި އެވެ.

ކަލަންޑަރުގައިވާ ގޮތުން މި އަހަރުގެ އަޟްހާ އީދަށް ވަނީ ޖޫން 6 ވާ ހުކުރު ދުވަހެވެ. އީދު ނަމާދު ކުރަން ފަށާނީ ހެނދުނު 7:00ގަ އެވެ.

އިސްލާމިކް މިނިސްޓްރީން ބުނީ މާލޭ ސަރަހައްދުގައި އަޟްހާ އީދު ބޮޑު ޖަމާއަތް ހެދުމަށް ޓަކައި ހަތަރު މައިދާނެއް ހަމަޖައްސާފައިވާ ކަމަށެވެ.

އެއީ މާލޭގެ މާފަންނު ސްޓޭޑިއަމް ސަރަހައްދާއި، ވިލިމާލޭ ފުޓްބޯޅަދަނޑު އަދި ހުޅުމާލޭގެ ސްޓޭޑިއަމް އަދި ހުޅުމާލެ ފޭސް ދޭއްގެ ކުރިކެޓް ސްޓޭޑިއަމް ސަރަހައްދެވެ.

މިނިސްޓްރީން ބުނީ ބޮޑު ޖަމާއަތް ހެދުމަށް ހަމަޖެހިފައިވާ މައިދާންތަކުގެ އިތުރުން މަތީގައި ބަޔާން ކުރެވިފައިވާ މިސްކިތްތަކުގައި އީދު ނަމާދު ކުރުން ކުރިއަށް ދާނެ ކަމަށެވެ.

ނަމަވެސް، މޫސުން ގޯސްވުމުގެ ސަބަބުން އީދުގެ ބޮޑު ޖަމާއަތް ހެދުމަށް ކަނޑައެޅިފައިވާ 4 ސަރަހައްދުގައި، އީދުގެ ބޮޑު ޖަމާއަތް ނުބޭއްވޭ ފަދަ ހާލަތެއް މެދުވެރިވެއްޖެ ނަމަ، އާންމު ގޮތެއްގައި މާލެއާއި ވިލިމާލެ އަދި ހުޅުމާލޭގައި ހުކުރު ނަމާދު ކުރެވޭ ހުރިހާ މިސްކިތްތަކެއްގައި އީދު ނަމާދު ކުރެވޭނެ ކަމަށް އިސްލާމިކް މިނިސްޓްރީން ބުންޏެވެ.

އިސްލާމިކް މިނިސްޓްރީ