"ގައުމީ ދިފާއީ ބާރުގެ ގާބިލުކަން އިތުރު ކުރުމަށް ރައީސް ކުރައްވާ މަސައްކަތަށް ސާބަސް"

ރާއްޖޭގެ ދިފާއީ ބާރުގެ ގާބިލުކަން އިތުރު ކުރުމަށްޓަކައި ރައީސް ޑރ. މުޙައްމަދު މުއިއްޒު ކުރައްވާ މަސައްކަތަށް ޑިފެންސް މިނިސްޓަރު މުޙައްމަދު ގައްސާން މައުމޫން ތާރީފު ކުރައްވައި، އައްސަރިބަހާއި ސާބަސް ރައްދު ކުރައްވައިފި އެވެ.

ގައްސާން މި ފަދައިން ރައީސަށް ތައުރީފު ކުރެއްވީ، އޮސްޓްރޭލިއާ އާއި ރާއްޖޭއާ ދެމެދު އޮތް ހަރުދަނާ ގުޅުމުގެ ރަމްޒެއްގެ ގޮތުން ރާއްޖެއަށް އަސްކަރީ ކަނޑު އުޅަނދެއް ހަދިޔާ ކުރުމަށް އެ ގައުމުން ނިންމުމާ ގުޅިގެން އެ މަނިކުފާނަށް ޝުކުރު ދެންނެވުމުގެ ގޮތުން ކުރެއްވި އެކްސް ޕޯސްޓެއްގަ އެވެ.

ރާއްޖެއަށް އޮސްޓްރޭލިޔާއިން ހަދިޔާ ކުރަނީ ގާޑިއަން ކްލާސް ޕެޓްރޯލް އުޅަނދެކެވެ.

ގައްސާންގެ ޕޯސްޓުގައި ވިދާޅުވީ ގައުމީ ދިފާއީ ބާރުގެ އަސްކަރީ ގާބިލުކަން އިތުރު ކޮށްދެއްވުމަށް ރައީސް މުއިއްޒު ކުރައްވާ ބުރަ މަސައްކަތްޕުޅަށް އައްސަރިބަހާއި ސާބަހާއި ޝުކުރު ދަންނަވާ ކަމަށެވެ.

"ސިފައިންގެ އެންމެ މަތީ ވެރިޔާ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ގައުމީ ދިފާއީ ބާރުގެ އަސްކަރީ ގާބިލުކަން އިތުރު ކޮށްދެއްވުމަށް ކުރައްވާ ބުރަ މަސައްކަތްޕުޅަށް އައްސަރިބަހާއި ސާބަހާއި ޝުކުރު ހިތުގެ ފުންމިނުން ހިފެހެއްޓުމެއް ނެތި ދަންނަވަން،" ގައްސާން ވިދާޅުވި އެވެ.

މި އުޅަނދު ރާއްޖެއަށް ހަދިޔާ ކުރުމަށް ނިންމުމުން، ޑިފެންސް މިނިސްޓްރީން ނެރުނު ބަޔާނެއްގައި ބުނެފައި ވަނީ މިއީ އޮސްޓްރޭލިއާ އާއި ރާއްޖެއާ ދެމެދު އޮތް ޒަމާންވީ ބަދަހި ގުޅުން ރަމްޒުކޮށްދޭ ކަމެއް ކަމަށެވެ. އަދި މި އުޅަނދުގެ ސަބަބުން ރާއްޖޭގެ އިގުތިސޯދީ ސަރަހައްދު ބެލެހެއްޓުން ވަރުގަދަކޮށް، ރާއްޖޭގެ އިގުތިސޯދީ ސަރަހައްދުގައި ގާނޫނާ ހިލާފަށް ހިންގާ އަމަލުތައް ހުއްޓުވުމުގައި ވެސް މި އުޅަނދު މުހިއްމު ދައުރެއް އަދާ ކުރާނެ ކަމަށް އެ ބަޔާނުގައި ބުނެފައިވެ އެވެ.

މި އުޅަނު ބަނުމުގެ މަސައްކަތް މިހާރު ކުރަމުން އަންނައިރު، ރާއްޖެއާ ހަމައަށް އަޅުނދު ފޯރާވަރު ވާނީ އަންނަ އަހަރު އެވެ.