ނައިބު ރައީސް، ފިޔޯރީ ކައުންސިލާ ބައްދަލު ކުރައްވައިފި

ނައިބު ރައީސް ހުސައިން މުޙައްމަދު ލަތީފް، ގދ ފިޔޯރީ ކައުންސިލްގެ މެމްބަރުންނާއި ބައްދަލު ކުރައްވައިފިއެވެ.

މި ބައްދަލު ކުރެއްވުން އޮތީ މިއަދު ރައީސުލްޖުމްހޫރިއްޔާގެ އޮފީހުގަ އެވެ.

މި ބައްދަލު ކުރެއްވުމުގައި ފިޔޯރީގެ ތަރައްގީއަށް ބޭނުންވާ ކަންކަމާއި ރައްޔިތުން އެންމެ ބޭނުންވާ ކަންކަމާ ގުޅޭ ގޮތުން މަޝްވަރާ ކުރި އެވެ.

 މި މަޝްވަރާ ތަކުގައި، ރަށުގެ ޒުވާނުން މިހާރު ފުޓްސަލް ކުޅުމަށް ބޭނުން ކުރަމުންދާ ދަނޑާއި، އަދި ރަށާ އިންވެގެންވާ ފަޅުރަށްތައް ތަރައްގީ ކުރުމުގެ މަޝްރޫއުތައް ނިންމައިދިނުމަށް ކައުންސިލުން އެދުނެވެ.

މިއަދުގެ ބައްދަލުވުމުގައި ނައިބު ރައީސް ވަނީ ކައުންސިލްގެ ރައީސާއި، ކައުންސިލް މެންބަރުން ފާހަގަ ކުރެއްވި ކަންކަމަށް އަވަސް ހައްލެއް ހޯއްދަވައިދެއްވުމަށް ކަމާ ގުޅުން ހުރި އިދާރާތަކާ މަޝްވަރާކުރެއްވުމަށްފަހު، އެކަން ބައްލަވާނެކަމުގައި ވިދާޅުވެފަ އެވެ.

މީގެ އިތުރުން ކައުންސިލުން ހުށަހެޅުއްވި ހުރިހާ ކަމަކަށް ވެސް ސަމާލުކަން ދެއްވާނެކަމުގައި ނައިބު ރައީސް ވިދާޅުވި އެވެ.