މައްސަލަ ހައްލުކޮށް މާލެއަށް ކަރަންޓު ދީފި

ދިމާވި ޓެކްނިކަލް މައްސަލައަކާ ގުޅިގެން މާލެއާއި ހުޅުމާލެއިން ކަރަންޓުގެ ހިދުމަތް މެދުކެނޑިފައި ވަނިކޮށް، މުޅި މާލެއަށް އަލުން ކަރަންޓު ދީފި އެވެ.

ކަރަންޓުގެ ހިދުމަތް ކެނޑުނީ މިއަދު ގާތްގަނޑަކަށް 12:30 ހާއިރު އެވެ.

މާލޭ ސަރަހައްދުން ކަރަންޓު ކެނޑުނުތާ ފަސް ގަޑިއިރު ފަހުން، ދާދި ދެންމެއަކު ސްޓެލްކޯއިން ބުނީ މާލޭގެ ހުރިހާ ސަރަހައްދަކަށް މިހާރު ކަރަންޓު ދީފައިވާ ކަމަށެވެ.

ސްޓެލްކޯއިން ބުނީ، ހުޅުމާލޭ ރުއްގަނޑު އެކެއް ސަރަހައްދުގައި ބަހައްޓާފައި ހުރި ޓްރާންސްފޯމަރެއް ފިޔަވާ، އެހެން ހުރިހާ ޓްރާންސްފޯމަރެއް މިހާރު އެޖަނައިޒް ކުރެވިފައިވާ ކަމަށެވެ.

މި ސަރަހައްދުތައް ފިޔަވާ އެހެން ސަރަހައްދުތަކުގައި ކަރަންޓު ނުލިބޭ ކަސްޓަމަރެއް ހުރި ނަމަ ސްޓެލްކޯގެ އެމަޖެންސީ ނަންބަރު، 104 އަށް ގުޅުމަށް ވެސް އެ ކުންފުނިން  އެދިފައިވެ އެވެ.

މި މައްސަލައާ ގުޅިގެން ސްޓެލްކޯއިން މިއަދު ނޫސްވެރިންނަށް މައުލޫމު ދެމުން ބުނީ ކަރަންޓު ކެނޑެން ދިމާވި ސަބަބު އަދި މިހާތަނަށް ދެނެގަނެވިފައިނުވާ ކަމަށާއި މުޅި މައްސަލަ ހައްލު ކުރުމަށްފަހު، އެކަން ބަލައި ރައްޔިތުންނާ ހިއްސާ ކުރާނެ ކަމަށެވެ.

މުޅި މާލެ ސަރަހައްދުން ކަރަންޓު ކެނޑުނު މައްސަލަ ސީރިއަސް މައްސަލައެއްގެ ގޮތުގައި ބެލުމަށް ކަމާބެހޭ ފަރާތްތަކަށް ރައީސުލްޖުމްހޫރިއްޔާ ވަނީ އަންގައިފަ އެވެ.

އަދި އެ ފަދަ ކަމެއް ތަކުރާރު ނުވާނޭހެން ކަރަންޓުގެ ހިދުމަތުގެ ކަންކަން އިންތިޒާމް ކުރަންޖެހޭ ހުރިހާ ކަމެއް ސަރުކާރުން ކުރާނެ ކަމުގެ ޔަގީންކަން ވެސް ރައީސް ދެއްވާފައިވެ އެވެ.