ހެޔޮލަފާ ވެރިކަމެއްގެ ހަގީގީ މަންޒަރުތައް ރައްޔިތުންނަށް ދަނީ ފެންނަމުން: ފަހުމީ

ހެޔޮލަފާ ވެރިކަމެއްގެ ހަގީގީ މަންޒަރުތައް ރައްޔިތުންނަށް މިއަދު ފެންނަމުންދާ ކަމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.

ފަހުމީ މިހެން ވިދާޅުވީ ޑޮމެސްޓިކް ކެޓެގަރީގެ ކަރަންޓު ޓެރިފު ރޭޓު ކުޑަކުރަން ރައީސް ޑރ. މުޙައްމަދު މުއިއްޒު، ނިންމެވުމާ ގުޅުވައިގެން އެ މަނިކުފާނަށް މަރުހަބާ އާއި ޝުކުރު ދަންނަވާ، ކުރެއްވި އެކްސް ޕޯސްޓެއްގަ އެވެ.

އެ ޕޯސްޓުގައި ފަހުމީ ވިދާޅުވީ ރައްޔިތުންގެ އިހުސާސްތަކާއި އެއްގޮތަށް ހިންގާ ހެޔޮލަފާ ވެރިކަމެއްގެ ހަގީގީ މަންޒަރުތައް ދިވެހި ރައްޔިތުންނަށް ފެނި ކަށަވަރުވަމުން އަންނަ ކަމަށެވެ.

"ކުރީގެ އެއްވެސް ސަރުކާރަކުން ކުރަން ކެރިފައި ނުވާ ކަމެއް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިހާރު ވަނީ ކުރައްވައި، އެކަން ރަސްމީކޮށް އިއުލާން ކުރައްވާފައި،" ފަހުމީ ވިދާޅުވި އެވެ.

ރައީސް މުއިއްޒު ވިދާޅުވީ މިއަންނަ ޖޫން މަހުގެ ފުރަތަމަ ދުވަހުން ފެށިގެން ޑޮމެސްޓިކް ކެޓެގަރީގެ ކަރަންޓް ޓެރިފް ރޭޓު ކުޑަ ކުރުމުގެ ކަންކަން ތަންފީޒު ކުރުމުގައި ދެމެހެއްޓެނިވި ގޮތެއްގައި މެނޭޖު ކުރުމަށް ކަމާބެހޭ ފަރާތްތަކުން ކުރަންޖެހޭ އެންމެހާ ކަންކަން ކުރުމަށް މިހާރު އަންގަވާފައިވާނެ ކަމަށެވެ.

އަދި އެމަނިކުފާނު ކުރެއްވި ޕޯސްޓުގައި ވަނީ ޑޮމެސްޓިކް ކެޓަގަރީގެ ކަރަންޓު ޓެރިފް ރޭޓުގެ ގޮތުގައި މިހާރު ނަގަމުން އަންނަ އަދަދާއި އަގު ހެޔޮކުރުމުން ނަގާނެ އަދަދު ވެސް ހިމަނުއްވައިފައިވެ އެވެ.

އެއީ:

ރައީސްގެ ވައުދުފުޅާ އެއްގޮތަށް ކަރަންޓް ބިލުތަކުން ރައްޔިތުންނަށް ލުއި ދިނުމަށް ސަރުކާރުން ވަނީ، ރިޔާސީ ދައުރުގައި މި ފާއިތުވި 2 ރަމަޟާން މަހުވެސް، ޑިސްކައުންޓު ދީ، ވަކި މިންވަރެއް މައާފު ވެސް ކޮށްދެއްވާފަ އެވެ.

އާއްމު ރައްޔިތުންގެ މާލީ ހާލަތު ރަނގަޅު ކުރުމަށް މި ސަރުކާރުން އަޅަމުން އަންނަ ފިޔަވަޅު ތަކުގެ ތެރެއިން، ޑޮމެސްޓިކް ރޭޓުގައި ހުންނަ ގޭބިސީތަކުގެ ކަރަންޓު ބިލާއި ފެން ބިލުތައް ނުދެއްކި ގިނަދުވަސް ވެގެން އަރާފައިވާ ޖޫރިމަނާ ވެސް ވަނީ މައާފުކޮށްދީފަ އެވެ.

މިއަހަރުގެ ރޯދަ މަހުގެ ކަރަންޓު ބިލު ތަކަށް ދިން ޑިސްކައުންޓުގެ އިތުރުން، މިދިޔަ އޭޕްރީލް ގައި ވެސް، ހޫނު ގަދަވުމުގެ ސަބަބުން ކަރަންޓު ބޭނުން ކުރި މިންވަރު އިތުރުވެފައި ވާތީ، ގޭބިސީ ތަކުގެ ކަރަންޓު ބިލު ތަކަށް ބޮޑު ލުޔެއް ސަރުކާރުން ދިންކަން ފާހަގަކޮށްލެވެ އެވެ.