"އަޅުގަނޑަށް މުހިއްމީ ވިޔަފާރިވެރިން ރައްޔިތުންނަށް ނިކަމެތިކަން ދިނުމުގެ އާދަ ފޮހެލުން"

އެމަނިކުފާނަށް މުހިންމީ ވިޔަފާރިވެރިން ރައްޔިތުންނަށް ދެރަ ނިކަމެތިކަން ދިނުމުގެ އާދަ މި ގައުމުން ފިލުވާލުން ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ޕީއެސްއެމަށް ދެއްވި އިންޓަވިއުއެއްގައި ރައީސް ވިދާޅުވީ އައިޖީއެމްއެޗު އާއި ސަރުކާރު ހޮސްޕިޓަލްތަކުން އައިނު ވިޔަފާރި ފެށުމަށް ނިންމެވީ އައިނަށް އާސަންދައިން ދޫ ކުރާ މިންވަރު 2000 ރުފިޔާއަށް މަތި ކުރުމުން، އެ އަގުގައި ދަށް ފެންވަރުގެ އައިނު ރައްޔިތުންނަށް ފޯރުކޮށްދީ، އެކަމުން އަމިއްލަ ވިޔަފާރިވެރިން ނާޖާއިޒު ފައިދާ ނެގުމަށް ފުރުސަތު ނުދިނުމަށް ކަމަށެވެ.

"އަޅުގަނޑަށް މުހިންމީ ވިޔަފާރިވެރިން ރައްޔިތުންނަށް ދެރަ ނިކަމެތިކަން ދިނުމުގެ އާދަ މިގައުމުން ފިލުވާލަން، އެހެންވެގެން ސިނގިރޭޓް ބިޒްނަސްވެސް ރާއްޖެއިން ހުއްޓާލާފައި އެހެން ކަމަކަށް ވަޑައިގަންނަވާށޭ ދެންނެވީ، އަޅުގަނޑަށް މުހިންމީ ރައްޔިތުންގެ ސިއްހަތު،" ރައީސް ވިދާޅުވި އެވެ.

ރައީސް އަށް އެންމެ މުހިންމު ދެ ވަނަ ސިޔާސަތަކީ ސިއްހީ ދާއިރާ ތަރައްގީ ކުރުންކަން ފާހަގަ ކުރައްވައި، މި ސަރުކާރުން ސިއްހީ ދާއިރާ ތަރައްގީ ކުރުމަށް ކުރާ މަސައްކަތް ތަކަށް އަލި އަޅުއްވާލެއްވި އެވެ. ހަމައެއާ އެކު، ސިއްހީ ދާއިރާ ރަނގަޅު ކުރުމަކީ ހުރިހާ ކަމަކާ ގުޅި ލާމެހިފައިވާ ކަމެއް ކަމަށާއި، އެހެންކަމުން މި ސަރުކާރުން އިންސާނީ ވަސީލަތް އިތުރު ކުރުމާއި އުމްރާނީ ގޮތުންނާއި ވަސީލަތުގެ ގޮތުން އެ ދާއިރާ ތަރައްގީ ކުރުމަށް އިސްކަން ދެއްވާކަން އެ މަނިކުފާނު ފާހަގަ ކުރެއްވި އެވެ.

މި ގޮތުން މިހާރު ވެސް 400 މިލިއަން ރުފިޔާއަށް ވުރެ، ގިނަ ސިއްހީ ދާއިރާގެ މަޝްރޫއު ރާއްޖޭގެ އެކި ކަންކޮޅު ތަކުގައި ކުރިއަށްދާ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ ސިއްހީ ހިދުމަތް ހޯދަން، ބޮޑު ތަކުލީފެއް އުފުލާފައި، ރާއްޖޭން ބޭރަށް ދިވެހި ރައްޔިތުން ދާދިއުން ނިމުމަކަށް ގެނައުމަކީ އެ މަނިކުފާނުގެ އަމާޒު ކަމަށެވެ. އަދި މާލެސިޓީ ހޮސްޕިޓާތައް ވެސް ފެންވަރު ރަނގަޅު ކުރަމުން ގެންދަވަނީ އެކަން ނިމުމަކަށް ގެނައުމަށް ކަމަށް އެމަނިކުފާނު ވިދާޅުވި އެވެ.