ރާއްޖޭގައި ސިޔާސީ ޕާޓީތަކަށް ދައުލަތުން ފައިސާ ދެމުން ދަނީ ކުރާ މަސައްކަތަށްވެސް ބެލުމަށް ފަހުގައި ކަަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގް ވިދާޅުވެއްޖެއެވެ.

ޝަރުތު ހަމަވާ 6 ސިޔާސީ ޕާޓީއަކަށް އީސީން ވަނީ ފައިސާ ދޫކޮށްފައެވެ.

އެކަމާއި ގުޅިގެން މީހަކު ވަނީ ސިޔާސީ ޕާޓީތަކަށް މިހާ ބޮޑެތި އަދަދުތަކުން ދައުލަތުގެ ބަޖެޓުން ހަރަދުކުރާއިރު، ސިޔާސީ ޕާޓީތަކުގެ އަސްލު މަގްސަދު ހާސިލް ވޭތޯ ސުވާލު ކޮށްފައެވެ.

އެ ސުވާލަށް ޖަވާބު ދެއްވަމުން ފުއާދު ވިދާޅުވީ 2022 ވަނަ އަހަރުން ފެށިގެެން ކޮންމެ އަހަރަކުވެސް ޕާޓީތަކުގެ އޮފީހަށް އީސީގެ ޓީމަކުން ގޮސް ލިޔެކިޔުންތަކާއި އެ ޕާޓީތަކަށް ކުރެވިފައިވާ މަސައްކަތްތައް ބަލާ ކަމަށެވެ.

ސިޔާސީ ޕާޓީތަކަށް ފައިސާ ދޫކުރި އަދަދުތައް:

• މޯލްޑިވިއަން ޑިމޮކްރެޓިކް ޕާޓީ(އެމްޑީޕީ): 15.1 މިލިއަން ރުފިޔާ
• ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް): 10.4 މިލިއަން ރުފިޔާ
• ޖުމްހޫރީ ޕާޓީ (ޖޭޕީ): 5.3 މިލިއަން ރުފިޔާ
• މޯލްޑިވްސް ޑިވެލޮޕްމެންޓް އެލަޔަންސް(އެމްޑީއޭ): 2.4 މިލިއަން ރުފިޔާ
• ޕީޕަލްސް ނޭޝަނަލް ކޮންގްރެސް (ޕީއެންސީ): 8.0 މިލިއަން ރުފިޔާ
• އަދާލަތު ޕާޓީ: 2.5 މިލިއަން ރުފިޔާ

‏ދައުލަތުގެ ބަޖެޓުން ސިޔާސީ ޕާޓީތަކަށް ފައިސާ ދެނީ ޑިސެމްބަރު 31 ގެ ނިޔަލަށް އެ ޕާޓީގައި މެންބަރުން ތިބި އަދަދަށް ބޮލަކަށް 289.62 ރުފިޔާގެ ރޭޓުން ކަމަށް އީސީން ވަނީ މީގެ ކުރިން ވިދާޅުވެފައެވެ.

ސިޔާސީ ޕާޓީތަކަށް ދައުލަތުގެ ބަޖެޓުން ދޭން ޖެހޭ ފައިސާގެ ގޮތުގައި މި އަހަރު 44 މިލިއަން ރުފިޔާ ދޫކުރަން ހަމަޖެހިފައި ވެއެވެ.