ހުޅުމާލެ މާސްޓާ ޕްލޭނަށް އާންމުންގެ ހިޔާލު ހޯދަން ހުޅުވާލައިފި

ހުޅުމާލޭ ރިވައިޒްޑް މާސްޓާ ޕްލޭނަށް އާންމުންގެ ހިޔާލު ހޯދަން ހައުސިން ޑިވެލޮޕްމެންޓް ކޯޕަރޭޝަން (އެޗުޑީސީ) އިން ހުޅުވާލައިފި އެވެ.

އެޗުޑީސީން ބުނީ މާސްޓާ ޕްލޭނަށް ބަދަލު ގެނައީ ހުޅުމާލޭގެ ބަނދަރުގެ ޖާގަ ތަނަވަސްކުރުމާ އެކު، ހުޅުމާލެއަށް ބޭނުންވާ އިތުރު ތަރައްގީގެ މަޝްރޫއު ތަކަށް ފުރުސަތު ހޯދުމުގެ ބޭނުމުގައި ކަމަށެވެ.

އެ ކޯޕަރޭޝަންގެ މެނޭޖިން ޑިރެކްޓަރު މުޙައްމަދު މައުރޫފު ޖަމީލް ވިދާޅުވި ގޮތުގައި، މި މާސްޓާ ޕްލޭނަކީ ހުޅުމާލޭގައި ދިރިއުޅޭ ރައްޔިތުންނަށް ގިނަ ފަސޭހަތައް ހޯދައިދިނުމަށް އިތުރު ވަސީލަތްތަކާ އެކު ހުޅުމާލެ ތަރައްގީ ކުރުމަށް ކުރެވޭ މަސައްކަތުގެ މުހިންމު ބައެއް ކަމަށެވެ.

މި މާސްޓާ ޕްލޭނާ ގުޅޭ އެންމެހާ މައުލޫމާތު އެޗުޑީސީގެ ޕޯޓަލުން މިހާރު ފެންނަން ހުންނާނެ އެވެ. އަދި ބޭނުންވާ ފަރާތްތަކަށް އޮންލައިންކޮށް، ހިޔާލު ހުށަހެޅުމުގެ ފުރުސަތު ވެސް މާސްޓާ ޕްލޭން ލޯންޗުކުރުމާ އެކު ވަނީ ހުޅުވާލާފަ އެވެ.

ހިޔާލު ހުށަހެޅުމުގެ ސުންގަޑިއަކީ އަންނަ މަހުގެ 16 ވަނަ ދުވަހެވެ. މާސްޓާ ޕްލޭން ފައިނަލް ކުރާނީ އާންމުންގެ ހިޔާލާއި ހުށަހެޅުން ތަކަށް ބެލުމަށްފަހު އެވެ.

އެޗުޑީސީން ބުނީ އެ ކޯޕަރޭޝަނުން އަބަދުވެސް މަސައްކަތް ކުރަނީ އާންމުންގެ ހިޔާލާއި މަޝްވަރާއާ އެކު ހުޅުމާލެ ތަރައްގީކޮށް، އެންމެ ޒަމާނީ ވަސީލަތްތަކާ އެކު ތަރައްގީވެފައިވާ ހިތްފަސޭހަ އައިލެންޑް ސިޓީއަކަށް ހުޅުމާލެ ހެދުމަށް ކަމަށެވެ.

ހުޅުމާލޭގެ ތަރައްގީއަށް ބޭނުންވާ މުހިންމު ބަދަލުތައް ހިމަނައިގެން ރިވައިޒްކުރި މި މާސްޓާ ޕްލޭން ލޯންޗު ކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.

މި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައީސް ވިދާޅުވީ މި މާސްޓާ ޕްލޭނަކީ، ހުޅުމާލޭގައި ސަރުކާރުން ކުރިއަށް ގެންދަން ގަސްތުކުރާ ތަރައްގީގެ އެކިއެކި މަޝްރޫއުތަކާއި، އަދި ހުޅުމާލޭގެ ދެ ވަނަ ފިޔަވައްސާއި ތިން ވަނަ ފިޔަވަހީގައި ފައިނޭންޝަލް ސެންޓަރާ އެކު ގުޅިލާމެހިގެން، އިންޓަގްރޭޓަޑް ގޮތެއްގައި ތަރައްގީ ގެނައުމަށް މަގުފަހިވެގެންދާ މާސްޓާ ޕްލޭނެއް ކަމަށެވެ.