މިވަގުތު މާއްކާގައި ތިބީ 499 ދިވެހި ހައްޖާޖީން، އެންމެންގެ ހާލު ރަނގަޅު

މި އަހަރުގެ ހައްޖުގެ މަތިވެރި އަޅުކަން އަދާ ކުރުމަށް ރާއްޖެއިން މައްކާއަށް ދިޔަ ދެ ގުރޫޕުގައި ހިމެނޭ އެންމެންގެ ހާލު ވެސް ރަނގަޅު ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު ޝަހީމް ކުރެއްވި އެކްސް ޕޯސްޓެއްގައި ވިދާޅުވީ ރާއްޖެއިން ހައްޖުގެ އަޅުކަމަށް ދިޔަ މީހުންގެ ތެރެއިން މިވަގުތާ ހަމައަށް މައްކާއަށް ދެވިފައި ވަނީ 499 މީހުންނަށް ކަމަށެވެ. އަދި އެ ހުރިހާ ހައްޖާޖީންގެ ހާލު ރަނގަޅު ކަމަށް އެ މަނިކުފާނު ވިދާޅުވި އެވެ.

"ދިވެހިރާއްޖޭގެ ހައްޖު މިޝަނުން ދަނީ ހައްޖުވެރިންގެ ހާލު ވަރަށް ގާތުން ބަލަމުން، ހައްޖު ކޯޕަރޭޝަނުން ވަނީ ފުރިހަމަ އިންތިޒާމުތަކެއް ކޮށްފައި،" ޝަހީމް ވިދާޅުވި އެވެ.

ކުރީ އަހަރުތަކެކޭ އެއްގޮތަށް ހައްޖުވެރީން އެއާޕޯޓަށް ދިއުމުގައި މިއަހަރު ވެސް ސަރުކާރުން ވަނީ ފަސޭހަ އިންތިޒާމުތަކެއް ހަމަޖައްސައިދީފަ އެވެ. އެ ގޮތުން މާލެއާއި ހުޅުމާލެއިން ބަހުގައި ދަތުރު ކުރެވޭނެ އިންތިޒާމުތައް ހަމަޖައްސާފައިވެ އެވެ.

ރާއްޖެއިން ހައްޖަށް ދާ މީހުން މި އަހަރު ހަތަރު ފުލައިޓެއްގައި ދަތުރު ކުރާނެ އެވެ. އެއީ ސައުދީ އަރަބިއާގެ ދެ ފުލައިޓަކާއި މޯލްޑިވިއަންގެ ދެ ފުލައިޓެއްގަ އެވެ.

ހައްޖުވެރީންގެ ދެ ވަނަ ގުރޫޕު ފުރާފައިވާއިރު، ބުރާސްފަތި އަދި ހުކުރު ދުވަހުވެސް ހައްޖުވެރީން ފުރުމަށް ހަމަޖެހިފައިވެ އެވެ.

ދިވެހި ހައްޖުވެރީން މި ފަހަރު މައްކާއަށް ފުރަނީ، ސައުދީ އަރަބިއްޔާގެ އިމިގްރޭޝަންގެ ހުރިހާ މަރުހަލާއެއް ފުރިހަމަ ކުރުމަށްފަހު އެވެ.