ހަންޏާމީދޫގެ ގޮނޑުދޮށް ހިމާޔަތް ކުރަން އެމްޓީސީސީ އަށް

އދ. ހަންޏާމީދޫ ގޮނޑުދޮށް ހިމާޔަތް ކުރުމުގެ މަސައްކަތް ސަރުކާރުން އެމްޓީސީސީއާ ހަވާލުކޮށްފި އެވެ.

މި މަސައްކަތް ހަވާލު ކުރުމަށް މިއަދު ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރު، ޑެޕިއުޓީ ކޮމިޝަނާ އޮފް ޕޮލިސް (ރިޓަޔާޑް) އަހުމަދު ސައުދީ އެވެ. ކޮންސްޓްރަކްޝަން މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރު އިބްރާހިމް ނަޒީމެވެ.

މި މަޝްރޫއުގެ ދަށުން، އެރަށު ގޮނޑުދޮށަށް 14,322.75 ކިއުބިކް މީޓަރުގެ ރާޅު ވެލި އެޅުމާއި 14,322.75 ކިއުބިކް މީޓަރުގެ ހިމުން ވެލި ގޮނޑުދޮށަށް އެޅުމާއި، 455 މީޓަރުގެ ބޮޑުހިލައިގެ ބޭރު ތޮއްޓެއް ލުމާއި، 440 މީޓަރުގެ ބޮޑު ހިލައިގެ ގްރޮއިން ޖެހުމުގެ މަސައްކަތް ހިމެނެ އެވެ.

މި މަޝްރޫއުގެ އަމަލީ މަސައްކަތް ފެށުމަށް ހަމަޖެހިފައި ވަނީ އެންވަޔަރަންމަންޓަލް އިމްޕެކްޓް އެސެސްމަންޓް (އީއައިއޭ) ހެދުމަށް ފަހު އެވެ.

މުޅިއެކު 240 ދުވަސް ތެރޭގައި ނިންމުމަށް ހަވާލުކުރި މި މަޝްރޫއަކީ 46.20 މިލިއަން ރުފިޔާއަށް އެމްޓީސީސީ އާ ހަވާލުކޮށްފައިވާ މަޝްރޫއެކެވެ.

760 މީހުންގެ އާބާދީއެއް އޮންނަ ހަންޏާމީދޫ ރައްޔިތުންގެ އެންމެ ބޮޑު އެއް ކަންބޮޑުވުމަކީ ރަށްގިރުމުގެ މައްސަލަ އެވެ. ރަށްގިރަމުން ދިއުމުގެ ސަބަބުން ރަށުގެ ރީތި ގޮނޑުދޮށްވެސް ވަނީ އެއްކޮށްހެން ގިރައި ހުސްވެފަ އެވެ.

ހަންޏާމީދޫއަކީ ފަތުރުވެރިކަމުން އާމްދަނީ ހޯދާ ރައްޔިތުން ގިނަ ރަށަކަށް ވެފައި، ރަށުގެ ރީތި ގޮނޑުދޮށް ގިރައިގެން ދިއުމަކީ ފަތުރުވެރިކަމުގެ ދާއިރާގައި މަސައްކަތް ކުރާ އެ ރަށު ރައްޔިތުންގެ ވަރަށް ބޮޑު ޝަކުވާ އެކެވެ.

އެހެންކަމުން މިއަދު މި ސޮއި ކުރި ގޮނޑުދޮށް ހިމާޔަތް ކުރުމުގެ މަޝްރޫއުގެ މަސައްކަތް ނިމުމާއެކު، ރަށްގިރުމުގެ މައްސަލައަށް ބޮޑު ހައްލެއް ލިބި ރަށުގެ ގޮނޑުދޮށް އިޔާދަކުރެވިގެން ދާނެ ކަމަށް އެމްޓީސީސީން ބުންޏެވެ. އަދި  މިކަމުގެ ސަބަބުން އިޖުތިމާއީ ގޮތުންނާއި އިގުތިސޯދީ ގޮތުން ރަށަށް ގިނަ ފައިދާ ތަކެއް ކުރާނެ ކަމަށް ވެސް އެ ކުންފުނިން ބުންޏެވެ.