އަރިދަފުސް ރޯގާ ފެތުރޭތީ ސަމާލުވާން އެދެފި

މި ދުވަސްވަރު އަރިދަފުސް ރޯގާ ޖެހިގެން ރިޕޯޓް ކުރާ އަދަދު އިތުރުވަމުން އަންނާތީ ސަމާލުވާން އިލްތިމާސްކޮށްފި އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ މިދިޔަ އޭޕްރީލް މަހުގެ 6 އިން ފެށިގެން މިހިނގާ މެއި މަހުގެ 17 ވަނަ ދުވަހާ ހަމައަށް ރިޕޯޓް ކުރެވުނު އަރިދަފުސް ރޯގާގެ ކޭސްތަކުގެ އަދަދު އިތުރުވެފައިވާ ކަމަށެވެ.

އެ ގޮތުން މި މުއްދަތުގައި އަރިދަފުސް ރޯގާގެ 43882 ކޭސް ރިޕޯޓްކޮށްފައިވާއިރު، މިދިޔަ އަހަރު ރިޕޯޓް ކޮށްފައިވާ ކޭސްތަކުގެ އަދަދަކީ 36048 އެވެ.

އަރިދަފުސް ރޯގޭގެ އިތުރުން އިންފުލުއެންޒާ ވެސް ވަނީ އިތުރުވެފަ އެވެ. މިދިޔަ އަހަރު 50 ކޭސް ރިޕޯޓް ކޮށްފައިވާއިރު، މި އަހަރު މި މުއްދަތުގައި 254 ކޭސް ރިޕޯޓުކޮށްފައިވެ އެވެ.

ނަމަވެސް މި މުއްދަތުގައި ކޮވިޑު ކޭސްތައް މާބޮޑު ތަފާތެއް ނާދެ އެވެ. މިދިޔަ އަހަރު 38 ކޭސް ރިޕޯޓްކުރިއިރު، މި އަހަރު ރިޕޯޓް ކުރީ 37 ކޭސް ކަމަށް ތަފާސް ހިސާބުތަކުން ދައްކަ އެވެ.

އެޗްޕީއޭ އިން ބުނީ މި ދުވަސްވަރު ރާއްޖޭގެ ހުރިހާ ހިސާބެއްގައި ވެސް އަރިދަފުސް ރޯގާ ޖެހިގެން ރިޕޯޓް ކުރާ އަދަދު އިތުރުވެފައިވާއިރު، ކޮވިޑާއި އިންފްލުއެންޒާ ޖެހިގެން އެންމެ ގިނައިން ރިޕޯޓް ކުރީ މާލޭ ސަރަހައްދުން ކަމަށެވެ.

އެހެން ކަމުން މި ފަދަ ރޯގާ ތަކުން ރައްކާތެރިވުމުގެ ފިޔަވަޅުތައް އަޅަމުން ގެންދިއުމަށް ސަމާލުކަން ދިނުމަށް އެޗްޕީއޭ އިން އިލްތިމާސްކޮށްފައިވެ އެވެ.

އެޗްޕީއޭގެ ތަފާސް ހިސާބުތައް ދައްކާ ގޮތުން މި އަހަރު ޑެންގީ ހުން ޖެހިގެން ރިޕޯޓް ކުރެވުނު އަދަދު މިދިޔަ އަހަރުގެ މި މުއްދަތާ އަޅާބަލާއިރު ދަށެވެ.