ދިވެހި ހައްޖުވެރީންނަށް ޖިއްދާ އެއާޕޯޓުން ހޫނު މަރުހަބާއެއް!

ދިވެހި ހައްޖުވެރީނަށް ޖިއްދާ އެއާޕޯޓުން މަރުހަބާ ކިޔުން: ފޮޓޯ/ އިސްލާމިކް މިނިސްޓްރީ

މިއަހަރު ހައްޖުގެ މަތިވެރި އަޅުކަން އަދާކުރުމަށް ސައުދީ އަރަބިއްޔާއަށް ދިޔަ ދިވެހި ހައްޖުވެރީނަށް ސައުދީ ސަރުކާރުން ހޫނު މަރުހަބާއެއް ކިޔައިފި އެވެ.

ހައްޖުވެރީންނަށް ޖިއްދާ އެއާޕޯޓުން މަރުހަބާ ދެންވުމަށް މައްކާ ރޫޓު އިނީޝިއޭޓިވްގެ ބޭފުޅުންނާއި ދިވެހި ހައްޖު މިޝަން، ސައުދީގައި ހުންނަ ދިވެހި އެމްބަސީ އަދި ހައްޖު ކޯޕަރޭޝަންގެ ބޭފުޅުން އެއާޕޯޓުގައި ހަރަކާތްތެރިވެލައްވާފައިވެ އެވެ.

މިއީ ދިވެހި ހައްޖުވެރީންނަށް މިފަދަ ގޮތަކަށް ޖިއްދާ އެއާޕޯޓުން މަރުހަބާ ދެންނެވި ފުރަތަމަ ފަހަރުކަން ފާހަގަ ކޮށްލެވެ އެވެ.

މިއަދު ރާއްޖޭގައި ރަސްމީކޮށް އިފްތިތާހު ކުރި މައްކާ ރޫޓު އިނީޝިއޭޓިވްގެ ދަށުން ހައްޖުވެރީން ރާއްޖެއިން ފުރުމުގެ ކުރިން ސައުދީ އަރަބިއްޔާގެ އިމިގްރޭޝަންގެ ހުރިހާ ކަމެއް ފުރިހަމަކުރެވިފައިވާއިރު، ހައްޖު ވެރީން ޖިއްދާ އެއާޕޯޓުގައި މަޑުނުކޮށް ސީދާ ހޮޓަލަށް ދެވޭނެ އިންތިޒާމް ވަނީ ހަމަޖެހިފައެވެ. މިއީ ދިވެހި ހައްޖުވެރީންނަށް ލިބިގެންދާ ބޮޑު ފަސޭހައެއްކަން ފާހަގަ ކޮށްލެވެ އެވެ.

މި އަހަރަކީ ދިވެހި ހައްޖުވެރީންގެ އިންތިޒާމުތަކަށް ރައީސް ޑރ. މުޙައްމަދު މުއިއްޒުގެ އިރުޝާދާއެކު ބޮޑެތި ބަދަލުތަކެއް ގެނެވި، ހިދުމަތުގެ ފެންވަރު ރަނގަޅު ކުރެވިގެންދާނެ އަހަރެކެވެ.

މިއަދު ރާއްޖެއިން ހައްޖަށް ފުރާފައި ވަނީ 234 ހައްޖުވެރީންނެވެ. ހައްޖުވެރީންގެ ދެ ވަނަ ފުލައިޓު ފުރުމަށް ހަމަޖެހިފައި ވަނީ މާދަމާ ހެނދުނު އެވެ.

އިސްލާމިކް މިނިސްޓްރީ