ހައްޖުވެރީންގެ ފުރަތަމަ ގުރޫޕުގައި 234 ހައްޖުވެރީން ފުރައިފި

މިއަހަރުގެ ހައްޖުގެ އަޅުކަން އަދާކުރުމަށް ރާއްޖެއިން ދާ ހައްޖުވެރީންގެ ފުރަތަމަ ގުރޫޕް ފުރައިފި އެވެ.

ހައްޖުވެރީންގެ ފުރަތަމަ ގުރޫޕް ފުރާފައި ވަނީ މިއަދު 15.14 ހާއިރު ސައުދީ އެއާލައިނުންނެވެ. މިފުލައިޓުގައި 234 މީހުން ފުރާފައިވެ އެވެ. މި ފުލައިޓް ޖިއްދާ އެއާޕޯޓްގައި މިހާރު ވަނީ ޖައްސާފަ އެވެ.

ކުރީ އަހަރު ތަކެކޭ އެއްގޮތަށް ހައްޖުވެރީން އެއާޕޯޓަށް ދިއުމުގައި މި އަހަރުވެސް ސަރުކާރުން ވަނީ ފަސޭހަ އިންތިޒާމުތަކެއް ހަމަޖައްސައިދީފަ އެވެ. އެ ގޮތުން މާލެއާއި ހުޅުމާލެއިން ބަހުގައި ދަތުރުކުރެވޭނެ އިންތިޒާމުތައް ހަމަޖައްސާފައިވެ އެވެ.

ސަރުކާރުން ވަނީ މާލެއިން 3 ރޫޓަކުން އަދި ހުޅުމާލެއިން 2 ރޫޓަކުން ބަސްދަތުރު ވަނީ ހަމަޖައްސާފަ އެވެ. ބަސް ދަތުރުތައް ފެށީ ހެނދުނު 10:30ގަ އެވެ.

މިއަދު ހައްޖުވެރީންގެ ފުރަތަމަ ގުރޫޕް ފުރާފައިވާއިރު އަންގާރަ، ބުރާސްފަތި އަދި ހުކުރު ދުވަހު ވެސް ހައްޖުވެރީން ފުރުމަށް ހަމަޖެހިފައިވެއެވެ.

ދިވެހި ހައްޖުވެރީން މި ފަހަރު މައްކާއަށް ފުރަނީ، ސައުދީ އަރަބިއްޔާގެ އިމިގްރޭޝަންގެ ހުރިހާ މަރުހަލާއެއް ފުރިހަމަ ކުރުމަށްފަ އެވެ.

މި ހިދުމަތް ދިވެހީންނަށް ފަހިވެފައި ވަނީ ސައުދީ ރަސްގެފާނު ސަލްމާން ބިން އަބްދުލްއަޒީޒުގެ ހާއްސަ އިރުޝާދުގެ ދަށުންނެވެ.