ފުރުމުގެ ތިން ގަޑިއިރު ކުރިން އެއާޕޯޓަށް ދާން އެދިއްޖެ

ފުރަން ހަމަޖެހިފައިވާ ގަޑީގެ، ތިން ގަޑިއިރު ކުރިން އެއާޕޯޓަށް ދިޔުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިލްތިމާސް ކޮށްފި އެވެ.

އެމްއޭސީއެލުން މި ގޮތަށް އިލްތިމާސް ކޮށްފައި މިވަނީ ހައްޖަށް ދާ މީހުންނާއެކު އެއާޕޯޓުގެ މަގުތަކާއި ޓާމިނަލް ސަރަހައްދު ބާރުބޮޑުވާނެތީ އެވެ.

އެހެންކަމުން ފުރުމުގެ ތިން ގަޑިއިރު ކުރިން އެއާޕޯޓަށް ދިއުމަށާއި އެއާޕޯޓު މުވައްޒަފުންގެ އިރުޝާދު ތަކަށް ތަބާވުމަށް އެ ކުންފުނިން ވަނީ އެދިފަ އެވެ.

"މި ބިޒީ ދަނޑިވަޅުގައި އެއާޕޯޓު ވަށައިގެން އަމާން ޓްރެފިކް ފްލޯއެއް ޔަގީން ކުރުމަށް ޓަކައި ޓެކްސީ ސެންޓަރުތަކާއި ޑްރައިވަރުން އެއްބާރުލުން ދިނުމަށް އެދެން،" އެމްއޭސީއެލުން ބުންނެވެ.

ރާއްޖެއިން މި އަހަރު ހައްޖަށް ދާ ހައްޖާޖީން ފުރަން ފަށާނީ މި މަހުގެ 26 ވަނަ ދުވަހުން ފެށިގެން 30 ވަނަ ދުވަހަށެވެ.

މި އަހަރު ވެސް ރާއްޖެއަށް ވަނީ 1000 ހައްޖު ކޯޓާ ލިބިފަ އެވެ. އޭގެ ތެރޭގައި ސަރުކާރުން ހައްޖަށް ފޮނުވާ 50 ފަގީރުން ވެސް ހިމެނެ އެވެ.

ރާއްޖެއިން ހައްޖަށް ދާ މީހުން މި އަހަރު ހަތަރު ފުލައިޓެއްގައި ދަތުރު ކުރާނެ އެވެ. އެއީ ސައުދީ އަރަބިއާގެ ދެ ފުލައިޓަކާއި މޯލްޑިވިއަންގެ ދެ ފުލައިޓެއްގަ އެވެ.