ގޭންގު ކުށްތައް ހުއްޓުވުމުގެ ބިލުން ރަނގަޅު ހައްލުތަކެއް ލިބޭނެ: އުޝާމް

ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނަކީ މި މައްސަލައަށް ހައްލު ގެންނަން ބޭނުންވާ ހުރިހާ ދާއިރާތަކަށް ފޯކަސްކޮށްގެން ހުރިހާ ކަމެއް ހިމެނޭ ގޮތަށް ފަރުމާކޮށްފައިވާ ގާނޫނެއް ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެ އެވެ.

ބަންޑާރަ ނައިބު މިހެން ވިދާޅުވީ ގޭންގުތަކުން ހިންގާ ކުށްތަކާއި އެ ނޫން ވެސް ނުރައްކާތެރި ކުށްތައް ހުއްޓުވުމުގެ ބިލު ތަސްދީގު ކުރެއްވުމަށް ރައީސް އޮފީހުގައި މިއަދު ބޭއްވި ރަސްމިއްޔާތުގަ އެވެ.

އުޝާމްގެ ވާހަކަފުޅުގައި ވިދާޅުވީ މި ބިލަކީ ރައީސް ޑރ. މުޙައްމަދު މުއިއްޒު މި މައްސަލަ ހައްލު ކުރައްވަން ބޭނުންފުޅުވެލައްވާތީ އެ މަނިކުފާނު އިސްނަންގަވައިގެން މަޖިލީހަށް ހުށަހެޅުއްވި ބިލެއް ކަމުގައެވެ. އަދި މި ބިލަކީ ސަރުކާރަށް އެއްވެސް މަޖުބޫރު ކަމެއް އޮވެގެން މަޖިލީހަށް ހުށަހެޅި ބިލެއް ނޫން ކަމަށް ވެސް ބަންޑާރަ ނައިބު އުޝާމް ފާހަ ގަކުރެއްވި އެވެ.

އެމަނިކުފާނު އިތުރަށް ފާހަގަ ކުރެއްވި ގޮތުގައި، 2010 ވަނަ އަހަރުން ފެށިގެން ވެސް ގޭންގު ކުށްތައް މަނާ ކުރުމާބެހޭ ގާނޫނެއް އޮތް ކަމަށާއި، އެ ގާނޫނުގައި އުނި ކަންތައް ތަކެއް ހުރުމުން ފުލުހުންގެ މުއައްސަސާ އަށާއި ޕްރޮސެކިއުޓާ ޖެނެރަލްގެ އޮފީހަށް ދައުވާ ކުރުމުގައި ވެސް ދަތިތަކެއް ދިމާވި ކަމަށެވެ.

ނަމަވެސް، މި ގާނޫނު ތަސްދީގު ކުރުމާއެކު އެ ހުރި ދަތިތަކަށް ހައްލެއް ގެނެވުނީކަން ފާހަގަ ކުރައްވާ، އުޝާމް ވިދާޅުވީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ މައްސަލައަށް ވަރަށް ރަނގަޅު ހައްލުތަކެއް މި ގާނޫނާ އެކު ލިބިގެން ދާނެ ކަމަށެވެ.

މި ގާނޫނަކީ، ރާއްޖޭގައި ނުރައްކާތެރި އަދި އިންތިޒާމު ވެގެން ހިންގާ ބޮޑެތި ކުށްކުރުން ހުއްޓުވުމަށް ޓަކައި ކަމާގުޅޭ ކުށާއި އަދަބު ކަނޑައެޅުމާއި، އެ ފަދަ ކުށްތައް ހުއްޓުވުމަށް ގާނޫނު ތަންފީޒު ކުރާ އިދާރާ ތަކަށް ލިބިދޭ ބާރުތައް ކަނޑައެޅުމާއި، އެ ފަދަ ކުށްތަކުން ކުޑަކުދިން ދުރު ކުރުމަށް ފިޔަވަޅު އެޅުމާގުޅޭ އުސޫލުތައް ކަނޑައެޅުމާއި، އެ ފަދަ ކުށްތަކުގައި ތުހުމަތު ކުރެވޭ ފަރާތްތައް މޮނިޓާކޮށް ކޮންޓްރޯލު ކުރުމާގުޅޭ އުސޫލުތައް ކަނޑައެޅުމާއި، އެނޫން ވެސް ކަމާބެހޭ އުސޫލުތައް ކަނޑައެޅުމުގެ ގާނޫނެވެ.