މުވައްޒަފުންގެ ޕާފޯމެންސް އެވޯޑު މި އަހަރު ތައާރަފު ކުރާނަން: އާދަމް ޝަރީފް

މިނިސްޓަރު އާދަމް ޝަރީފް -- ފޮޓޯ/ ރައީސް އޮފީސް

މިނިސްޓްރީގެ މުވައްޒަފުންގެ ޕާފޯމެންސް އެވޯޑު ތައާރަފުކޮށް މި އަހަރުން ފެށިގެން އެވޯޑު ދޭން ފަށާނެ ކަމަށް ލޯކަލް ގަވަނެންސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

އެ މަނިކުފާނު މިހެން ވިދާޅުވީ އެ މިނިސްޓްރީގެ ސިވިލްސާވިސް މުވައްޒަފުންނަށް، ވަޒީފާގެ މާހައުލުގައި ކަންތައް ކުރަންވީ ގޮތް ދަސްކޮށްދިނުމަށް މިއަދު ހެނދުނު އެ މިނިސްޓްރީގައި ބޭއްވި ޕްރޮގްރާމް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

މިނިސްޓަރު ވިދާޅުވީ މުވައްޒަފުން ކުރާ މަސައްކަތުގެ ފެންވަރު ވަޒަން ކުރެވި މި އަހަރުން ފެށިގެން ޕާފޯމެންސް އެވޯޑް މިނިސްޓްރީގައި ތައާރަފު ކުރައްވާނެ ކަމަށެވެ.

އެ މަނިކުފާނު މިއަދު މިކަން އިއުލާން ކުރެއްވި އިރު މިނިސްޓްރީގެ ޕްލޭނިން ޑިޕާޓްމެންޓާއި، ކޯޕަރޭޓް ޑިޕާޓްމެންޓުން ގުޅިގެން ޕާފޯމެންސް އެވޯޑްގެ އުސޫލު އެކުލަވައިލުމުގެ މަސައްކަތް އަންނަނީ ކުރަމުންނެވެ.

މިނިސްޓްރީގެ މުވައްޒަފުންގެ ތެރެއިން ޖީ.އެސް 3އިން އީ.އެކްސް 1ގެ މުވައްޒަފުންނަށް އަމާޒުކޮށްގެން "އޮފީސް އެޓިކެޓް"ގެ ނަމުގައި ބޭއްވި އިން ހައުސް ޓްރޭނިން ޕްރޮގްރާމްގެ ސެޝަންތައް ނަންގަވައިދެއްވީ، މިނިސްޓަރު އާދަމް ޝަރީފު އާއި، އެގްޒެކެޓިވް ޑިރެކްޓަރު ހާމިދު ޔޫސުފެވެ.

އާދަމް ޝަރީފް އުމަރު