ބީއެމްއެލުން ކ. އަތޮޅުގެ ހުރިހާ ރަށެއްގައި އޭޓީއެމް ހިދުމަތް ގާއިމުކޮށްފި

ކ. ހުރާގައި ބީއެމްއެލް އޭޓީއެމް ހިދުމަތް ތައާފު ކުރުން

ބޭންކް އޮފް މޯލްޑިވްސް (ބީއެމްއެލް) އިން ކ. އަތޮޅުގެ ހުރިހާ ރަށެއްގައި ސެލްފް ސާވިސް ބޭންކިން (އޭޓީއެމް) ހުޅުވައި ހިދުމަތްދޭން ފަށްޓައިފި އެވެ.

އަލަށް ހިދުމަތް ފެށުނު ކ. ހުރާ އޭޓީއެމް އާއި އެކު ކ. އަތޮޅުގައި މީހުން ދިރިއުޅޭ ހުރިހާ ރަށަކުން ވެސް ބީއެމްއެލްގެ އޭޓީއެމްގެ ހިދުމަތް މިހާރު ލިބިގެންދާނެ އެވެ. ހުރާއަކީ މާލެ އަތޮޅުގެ ރަށްތަކުގެ ތެރެއިން ބީއެމްއެލް އޭޓީއެމްގެ ހިދުމަތް މިހާތަނަށް ނުފެށި އޮތް ހަމައެކަނި ރަށެވެ.

ހުރާގައި ބޭއްވުނު ހާއްސަ ރަސްމިއްޔާތުގައި އެ ރަށުގައި އޭޓީއެމްގެ ހިދުމަތް ފައްޓަވައިދެއްވީ ލޯކަލް ގަވަނެންސް މިނިސްޓަރު އާދަމް ޝަރީފް އުމަރު އާއި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފު އެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވައުދުފުޅާއި އެއްގޮތަށް މުޅި ރާއްޖެއަށް ބީއެމްއެލްގެ އޭޓީއެމްގެ ހިދުމަތް ފުޅާ ކުރުމަށް ފަށާފައިވާ މަޝްރޫއުގެ ތެރެއިން ދ. އަތޮޅާއި، ހއ. އަތޮޅާއި، ނ. އަތޮޅާއި، މ. އަތޮޅަށް ފަހު ކ. އަތޮޅު މިއީ ބީއެމްއެލް އޭޓީއެމްގެ ހިދުމަތް ފުރިހަމަ ކުރެވުން 5 ވަނަ އަތޮޅެވެ.

މިއަހަރުގެ ނިޔަލަށް ބީއެމްއެލުން ބަހައްޓާ 103 އޭޓީއެމްގެ އިތުރަށް މޯލްޑިވްސް އިސްލާމިކް ބޭންކުން ވެސް 19 ރަށެއްގައި އޭޓީއެމް ބެހެއްޓުމަށް ހަމަޖެހިފައިވެ އެވެ. އެގޮތުން ޑިސެމްބަރުގެ ނިޔަލަށް މިމަޝްރޫއުގެ ދަށުން ޖުމުލަ 122 އޭޓީއެމް ބެހެއްޓުމަށް ހަމަޖެހިފައިވެ އެވެ.

ބީއެމްެއެލް އޭޓީއެމް