މައްކާ ރޫޓު އިނީޝިއޭޓިވް އިފުތިތާހު ކުރަން ސައުދީގެ އިސް ވަފުދެއް ރާއްޖެ އައިސްފި

މައްކާ ރޫޓް އިނީޝިއޭޓިވްގެ އިސް ވަފުދެއް ރާއްޖޭގައި މަސައްކަތް ކުރައްވަނީ -- ފޮޓޯ އިސްލާމިކް މިނިސްޓްރީ

މައްކާ ރޫޓު އިނީޝިއޭޓިވް އިފުތިތާހު ކުރުމަށް ސައުދީ އަރަބިއްޔާގެ އިސް ވަފުދެއް މިއަދު ރާއްޖެ އައިސްފި އެވެ.

މިއަދު މެންދުރު ރާއްޖެ އައި މި ވަފުދަށް ވެލާނާ އިންޓަނޭޝަނަލް އެއާޕޯޓުން މަރުހަބާ ދެންނެވީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އަދި ރާއްޖޭގައި ހުންނަ ސައުދީ އެމްބަސީގެ އިސް ބޭފުޅުންނެވެ.

މި ވަފުދުގައި ސައުދީ ހައްޖު މިނިސްޓްރީ އާއި، އިމިގްރޭޝަން އާއި، ފޮރިން މިނިސްޓްރީ އަދި މައްކާ ރޫޓު އިނީޝިއޭޓިވްގެ އިސް ބޭފުޅުން ހިމެނިލައްވަ އެވެ.

ދިވެހި ހައްޖުވެރިންނަށް މުޅިން އަލަށް ތައާރަފު ކުރާ މައްކާ ރޫޓު އިނީޝިއޭޓިވް ރަސްމީކޮށް އިފްތިތާހު ކުރުމަށް ހަމަޖެހިފައި ވަނީ މި މަހުގެ 26 ވަނަ ދުވަހު އެވެ.

މައްކާ ރޫޓު އިނީޝިއޭޓިވް އިފްތިތާހު ކޮށްދެއްވާނީ ރައީސުލްޖުމުހޫރިއްޔާ ޑރ. މުޙައްމަދު މުއިއްޒުގެ ދެކަނބަލުންނެވެ.

މައްކާ ރޫޓު އިނީޝިއޭޓިވްގައި ރާއްޖެ ހިމެނުއްވާފައިވަނީ ސައުދީ ރަސްގެފާނު ސަލްމާން ބިން އަބްދުލްއަޒީޒްގެ ހާއްސަ އިރުޝާދުގެ ދަށުން މި ކަމުގައި ގައުމުތައް ކަނޑައެޅުއްވުމަށް ނިންމަވާފައިވާ ހުރިހާ ޝަރުތުތަކަކުން ރާއްޖެ އިސްތިސްނާކޮށް ހާއްސަ ކަން ދެވިގެންނެވެ.

އިސްލާމިކް މިނިސްޓްރީ