ގައިދީންނަށް ގުރުއާން އުގަންނައިދިނުމުގެ އެއްބަސްވުމެއްގައި ސޮއިކޮށްފި

ޖަލު ތަކުގައި ތިބި ގައިދީންނަށް ކީރިތި ގުރުއާން އުގަންނައިދިނުމުގެ އެއްބަސްވުމެއްގައި މޯލްޑިވްސް ކަރެކްޝަނަލް ސާވިސް (އެމްސީއެސް) އާއި ކީރިތި ގުރުއާނާ ބެހޭ ގައުމީ މަރުކަޒުއާ ދެމެދު މިއަދު ސޮއިކޮށްފި އެވެ.

ކަރެކްޝަނާއި ގުރުއާނާބެހޭ މަރުކަޒު އާ ދެމެދު އެއްބަސްވުމުގައި ސޮއިކޮށްފައި ވަނީ މިއަދު ސަލްމާން ރަސްގެފާނު މިސްކިތުގައި އެކަމަށް ޓަކައި ބޭއްވި ރަސްމިއްޔާތެއްގަ އެވެ.

މި އެއްބަސްވުމުގައި އެމްސީއެސްގެ ފަރާތުން ސޮއި ކުރެއްވީ ކޮމިޝަނާ އޮފް ޕްރިޒަންސް ހަސަން ޒަރީރު އެވެ. އަދި ކީރިތި ގުރުއާނާ ބެހޭ މަރުކަޒުގެ ފަރާތުން ސޮއި ކުރެއްވީ ސްޓޭޓް މިނިސްޓަރު އަލްއުސްތާޒު އަބްދުﷲ ސައުދާން އެވެ.

ކަރެކްޝަނުން ބުނީ ދެ އަހަރު ދުވަހުގެ މުއްދަތަށް ސޮއި ކުރެވުނު މި އެއްބަސްވުމުގެ މައިގަނޑު މަގުސަދަކީ ސަރުކާރުގެ ސިޔާސަތްތަކާ އެއްގޮތަށް، އެ މުއައްސަސާގެ ބެލުމުގެ ދަށުގައިވާ ފަރާތް ތަކަށް ތަޖުވީދުމަގުން ރީތިކޮށް ގުރުއާން ކިޔަވަން ދަސްކޮށްދިނުމަށް މަރުކަޒުގެ މުދައްރިސުން ހަމަޖެއްސުމާ ގުޅޭ އެންމެހާ ކަންތައް ތަކަށް މަގުފަހިކޮށްދިނުން ކަމަށެވެ.

މި އެއްބަސްވުމުގެ ދަށުން، ކަނޑައެޅިފައިވާ އުޖޫރަ އަކަށް ކީރިތި ގުރުއާނާ ބެހޭ މަރުކަޒުން ޖަލު ތަކުގައި ތިބި ފަރާތް ތަކަށް ގުރުއާން އަދި ހިފްޒް ކްލާސްތައް ނަގައިދިނުމަށް މުދައްރިސުން ހަމަޖައްސާނެ ކަމަށް ކަރެކްޝަނުން ބުންޏެވެ.

އޭގެ އިތުރުން ކުޑަކުދީން ބަންދުކުރާ މަރުކަޒުގައި ތިބި ކުޑަކުދީންނަށްގެ ތައުލީމީ ފެންވަރަށް ރިއާއަތްކޮށް، ކުލާސްތައް ނަގައިދޭނެ މުގައްރަރު ކަނޑައެޅުމާއި ދަރިވަރުންގެ ކުރިއެރުމާއި އިމްތިހާނު ކުރުމާއި ވަޒަން ކުރާނެ އުސޫލުތައް ހެދުމާ އެކު އެ އުސޫލުތަކާ އެއްގޮތަށް ކުލާސްތައް ހިންގާނެ ކަމަށް ވެސް ކަރެކްޝަނުން ބުނެފައިވެ އެވެ.