މުއްޔާއި ނާލާފުށި، ކޯޒްވޭގެ މަޝްރޫއުގެ އަމަލީ މަސައްކަތް ރައީސް، ފައްޓަވައިދެއްވައިފި

މ. މުއްޔާއި އެ ރަށް ކައިރީގައި އޮންނަ ނާލާފުށި ކޯޒްވޭ މަޝްރޫއުގެ އަމަލީ މަސައްކަތް، ރައީސް ޑރ. މުޙައްމަދު މުއިއްޒު، ރަސްމީކޮށް ފައްޓަވައިދެއްވައިފި އެވެ.

އެ މަނިކުފާނު މި މަޝްރޫއު ފައްޓަވައިދެއްވީ މިއަދު މުލީގައި އެކަމަށް ޓަކައި ހާއްސަކޮށް ކުރިއަށް ގެންދިޔަ ރަސްމިއްޔާތެއްގަ އެވެ.

މުއްޔާއި ނާލާފުށި ކޯޒްވޭ ތަރައްގީ ކުރުމަކީ ރައީސްގެ ރިޔާސީ ވައުދުފުޅުގެ ތެރެއިން ކުރިއަށްގެންދާ މަޝްރޫ އެކެވެ.

މި މަޝްރޫއު ނިންމުމަށް ހަމަޖެހިފައި ވަނީ 600 ދުވަސް ތެރޭގަ އެވެ. މުލި، ނާލާފުށި ކޯޒްވޭ އަކީ 565 މީޓަރުގެ ކޯޒްވޭ އެކެވެ. މި މަޝްރޫއު ނިމެގެންދާއިރު މަގު ހެދުމާއި، ތާރު އެޅުމާއި، މަގު ބައްތި ޖެހުމުގެ އިތުރުން 112 މީޓަރުގެ ރިވެޓްމަންޓް ޖެހުމާއި 15 މީޓަރުގެ ގްރޮއިން ޖެހުން ވެސް ހިމެނެ އެވެ.

މުލި އަދި ނާލާފުށި ގުޅާލުމުން މަރުކަޒީކޮށް ހިދުމަތްތައްދީ، ވަސީލަތްތައް ހިއްސާ ކުރުމަށް ފަސޭހަ ވެގެންދާނެ އެވެ.

އަދި މީގެ ސަބަބުން ދެރަށް އެއްކޮށް އިގުތިސޯދީ ގޮތުން ކުރިއެރުވުމަށް ވެސް ފަސޭހަ ވެގެންދާނެ އެވެ.

މީގެ އިތުރުން ދެ ރަށުގެ އިޖުތިމާއީ ގުޅުން ބަދަހިވެ، ތަރައްގީގެ މަޝްރޫއުތައް ހިންގުމަށް ވެސް ފަސޭހަ ވެގެންދާނެ އެވެ.