މުލީ އެއާޕޯޓު ތަރައްގީވުމަކީ 30 އަހަރުގެ ދިގު އިންތިޒާރުގެ ނިމުން: މުލީ ކައުންސިލް

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، މ. މުލީ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީ، އަދި ރަށުގެ އިސްވެރީންނާ ބައްދަލު ކޮށްލައްވައިފި އެވެ. މި ބައްދަވުން ކުރިއަށް ގެންދިޔައީ މިއަދު މެންދުރުފަހު، މުލަކަތޮޅު އަތޮޅު ކައުންސިލްގެ އިދާރާގަ އެވެ.

މި ބައްދަލުވުމުގައި މުލީ ކައުންސިލުން ބުނީ އެ ރަށުގެ އެއާޕޯޓު ތަރައްގީ ވެގެން ދިއުމަކީ ރަށުގެ ރައްޔިތުންގެ 30 އަހަރު ދުވަހުގެ ދިގު އިންތިޒާރުގެ ނިމުން ކަމަށެވެ. އަދި މުލީ ރައްޔިތުންގެ ހުވަފެންތައް ހަގީގަތަކަށް ހައްދަވައި ދެއްވި ކަމަށް ޓަކައި މުލީ ކައުންސިލްގެ ފަރާތުން ރައީސަށް ޝުކުރު އަދާ ކުރެއްވި އެވެ.

މި ބައްދަލުވުމުގައި މުލީ ކައުންސިލުން ވަނީ ރަށުގެ ތަރައްގީއަށް އެންމެ ބޭނުންވާ ކަންކަން ފާހަގަ ކުރައްވާފަ އެވެ. މި ގޮތުން ސުކޫލުގެ ކުލާސް ރޫމްތައް އޭސީ ކޮށްދެއްވުމަށާއި، ރަށުން ރިހެބިލިޓޭޝަން ހިދުމަތް ލިބޭނެ މަގު ތަނަވަސް ކޮށްދެއްވުމަށް ކައުންސިލުން އެދިވަޑައިގެންނެވި އެވެ.

އޭގެ އިތުރުން ރަށުގައި އިންސާނީ ވަސީލަތް ގާއިމު ކުރުމަށް އެކި ދާއިރާ ތަކުން މީހުން ބިނާ ކުރުމަށް ހާއްސަ އިސްކަމެއް ދެއްވުމަށް ވެސް އެދިވަޑައިގެންނެވި އެވެ.

ހަމައެއާ އެކު، ރަށުގެ ރައްޔިތުން ޕިކްނިކް ދާނެ ވަކި ރަށެއް ތަރައްގީ ކޮށްދެއްވުމަށާއި، ފަތުރުވެރި ކަމުގެ ދާއިރާއާއި ސިއްހީ ދާއިރާ އަދި ކުޅިވަރުގެ ދާއިރާއިން ބޭނުންވާ ކަންކަން ކައުންސިލުން ހިއްސާ ކުރެއްވި އެވެ.

ކައުންސިލުން ފާހަގަ ކުރެއްވި ކަންކަމަށް އިޝާރާތް ކުރައްވާ ރައީސް ވިދާޅުވީ އެ މަނިކުފާނު ވައުދުވެފައިވާ ކަންކަން ފުއްދަވައިދެއްވާނެ ކަމަށެވެ. އަދި ކައުންސިލުން ފާހާގަ ކުރެއްވި ކަންކަން ބައްލަވާނެ ކަމަށް ވެސް ވިދާޅުވި އެވެ.