މުލީ އެއާޕޯޓަކީ ގިނަ ދާއިރާތަކަކުން ކުރިއެރުން ހޯދަދޭނެ ދޮރޯއްޓަކަށް ވެގެންދާނެ: ރައީސް

މ. މުލީ އެއާޕޯޓަކީ ގިނަ ދާއިރާތަކަކުން ކުރިއެރުން ހޯދަދޭނެ ދޮރޯއްޓަކަށް ވެގެންދާނޭ ކަމަށް، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

މުލީ އެއާޕޯޓް ހުޅުވުމާއެކު، މީހުން ދިރިއުޅޭ ކޮންމެ ރަށަކުން 30 މިނެޓުގެ ތެރޭގައި އެއާޕޯޓެއް އޮންނަ ރަށަކަށް ދެވޭ ގޮތް ހަދައިދިނުމަށް ސަރުކާރުންވެފައިވާ ވައުދު، މުލަކު އަތޮޅުގައި މި ވަނީ ފުއްދާފަ އެވެ.

އެ އެއާޕޯޓް ރަސްމީކޮށް ހުޅުއްވައިދެއްވުމަށްފަހު، ރައީސް ދެއްކެވި ވާހަކަފުޅުގައި، މުލީގެ ތަރައްގީއަށް، އެތައް ދާއިރާއަކުން ކުރިއެރުން ހޯދޭނެ ދޮރޯއްޓަކަށް މުލީ އެއާޕޯޓްވާނެ ކަމުގައި ފާހަގަކުރެއްވި އެވެ. ވަކިން ހާއްސަކޮށް، އިގުތިސާދީ ކުރިއެރުން ހޯދައިދެނިވި ދޮރޯއްޓެއް ކަމުގައި މުލީ އެއާޕޯޓް ވާނެ ކަމުގައި އެ މަނިކުފާނު ވަނީ ސިފަ ކުރައްވާފަ އެވެ.

ރައީސް ވަނީ، އެއާޕޯޓްތައް ތަރައްގީ ކުރެވި، ބިން ހިއްކައި، އުމްރާނީ ތަރައްގީގެ މަސައްކަތްތައް ކުރިއަށްގެންދެވޭ ރަށްރަށަކީ ސަރަހައްދީ ގޮތުން ތަރައްގީ ކުރެވޭ ރަށް ތަކެއްގެ ގޮތުގައި ބަލައި، އެހެން ރަށްރަށުގެ ރައްޔިތުން ވެސް އެ ކަމުގައި ބައިވެރިވުމަށް އެދިވަޑައިގަންނަވާފަ އެވެ.

ދެމެހެއްޓެނިވި ތަރައްގީ ހާސަލުވާން އޮތީ އެ ފަދައިން ކަމަށާ، ރަށްރަށަށް ހިޖުރަކޮށް އާބާދީ އެއްފަސް ކުރުމަކީ އެއްބަޔަކު އަނެއްބަޔަކާ ގުޅިލާމެހިގެން ނޫނީ ނުވާނެ ކަމެއް ކަމުގައި ވެސް އެ މަނިކުފާނު ވަނީ ފާހަގަ ކުރައްވާފަ އެވެ.

މުލީ އެއާޕޯޓަކީ ދިވެހި ދައުލަތުގެ ބަޖެޓުން ހަރަދު ކޮށްގެން އިންފްރާސްޓްރަކްޗާ މިނިސްޓްރީން އެމްޓީސީސީ އާ ހަވާލުކޮށްގެން ނިންމި މަޝްރޫއެކެވެ.