ކަސްޓަމްސް އަށް 164 އެސިސްޓެންޓު އޮފިސަރުން ހޯދަނީ

މޯލްޑިވްސް ކަސްޓަމްސް ސާވިސް އަށް 164 އެސިސްޓެންޓު އޮފިސަރުން ހޯދަން އިއުލާނު ކޮށްފި އެވެ.

ކަސްޓަމްސް އިން ކުރި އިއުލާނުގައި ބުނެފައި ވަނީ މި މަގާމަށް ހޮވޭ ފަރާތްތަކުން ވަޒީފާ އަދާ ކުރާން ޖެހޭނީ މާލެ ސަރަހައްދުގައި ގާއިމު ކޮށްފައިވާ ކަސްޓަމްސްގެ އޮފީސް ތަކުގައި ކަމަށެވެ.

މި މަގާމުގެ ޝަރުތު ތަކުގެ ތެރޭގައި ހިމެނެނީ ޖީސީ އޯލެވެލް ނުވަތަ އެ ފެންވަރުގެ އިމްތިހާނެއްގައި ދެ މާއްދާއިން ދަށްވެގެން ޑީ ފާސް ލިބިފައިވުމާ އެކު، ސެކަންޑަރީ ސުކޫލް ސެޓްފިކެޓް އިމްތިހާނުގައި ދިވެހި މާއްދާއިން ދަށްވެގެން، ސީ ފާސް ލިބިފައި ވުމެވެ.

މި މަގާމަށް ހޮވޭ ފަރާތަކަށް އަސާސީ މުސާރައިގެ ގޮތުގައި މަހަކު 5،000 ރުފިޔާ ލިބޭނެ އެވެ.

އިތުރު އިނާޔަތް ތަކުގެ ގޮތުގައި ލިބޭނީ ނޮން-ޕްރެކްޓިސިން އެލަވަންސުގެ ގޮތުގައި 1,750ރ. އާއި ސާވިސް އެލަވަންސުގެ ގޮތުގައި އޮފީހަށް ހާޒިރުވާ ކޮންމެ ދުވަހަކަށް 200ރ. އާއި ހާޒިރުވާ ކޮންމެ ދުވަހަކަށް ކޮއްތު ފައިސާ އަށް 60ރ. އެވެ.

އަދި ކަނޑައެޅިފައިވާ އުސޫލާ އެއްގޮތަށް މިނިމަމް ވޭޖު އެލަވަންސުގެ އިތުރުން ކަސްޓަމްސްގެ ގާނޫނާއި ގަވާއިދާ އެއްގޮތްވާ ގޮތުގެ މަތީން އިތުރު ގަޑީގެ ފައިސާ އާއި ބަންދު ފައިސާއާ އެހެނިހެން އިނާޔަތްތައް ލިބޭނެ އެވެ.

މި މަގާމު ތަކަށް ކުރިމަތި ލެވޭނީ މީލާދީ ގޮތުން 18 އަހަރާއި 30 އަހަރާ ދެމެދުގެ މީހުންނަށެވެ.

ވަޒީފާއަށް އެދި އެޕްލިކޭޝަން ހުށަހެޅުމުގެ ސުންގަޑި އަކީ މި މަހުގެ 31 ވާ ހޮނިހިރު ދުވަހުގެ 14:00 އާ ހަމައަށެވެ.