ކުޅުދުއްފުށީ ބަނދަރު ބޮޑުކުރުމުގެ މަސައްކަތް އެމްޕީއެލްއާ ހަވާލުކޮށްފި

ހދ. ކުޅުދުއްފުށި ސިޓީ ވިޔަފާރި ބަނދަރު ބޮޑު ކުރުމުގެ މަސައްކަތް މޯލްޑިވްސް ޕޯޓްސް ލިމިޓެޑް (އެމްޕީއެލް)އާ ހަވާލުކޮށްފި އެވެ.

މިއަދު ބޭއްވި ރަސްމިއްޔާތުގައި އެކަމާ ގުޅޭ އެއްބަސްވުމުގައި ސޮއިކުރީ އިކޮނޮމިކް މިނިސްޓަރު މުޙައްމަދު ސައީދާއި އެމްޕީއެލްގެ ސީއީއޯ މުޙައްމަދު ރިޝްވާނެވެ.

މިކަމާ ގުޅިގެން އިކޮނޮމިކް މިނިސްޓްރީން މިއަދު ނެރުނު ބަޔާނުގައި ބުނަނީ މި މަޝްރޫއުގެ ދަށުން ތަރައްގީ ކުރެވޭ ބަނދަރަކީ ރާއްޖޭގެ ސަރަހައްދީ ބަނދަރުތައް ތަރައްގީކޮށް، ދަތުރުފަތުރުގެ ވިއުގަ އަކުން ރަށްތައް ގުޅާލައި، އަތޮޅު ތެރޭގެ ވިޔަފާރި ކުރިއެރުވުމަށް ރައީސް ޑރ. މުޙައްމަދު މުއިއްޒު، ހާއްސަ އިސްކަމެއް ދެއްވައިގެން ތަރައްގީ ކުރުމަށް ރާވާފައިވާ ބަނދަރު ތަކުގެ ތެރޭގައި ހިމެނޭ ބަނދަރެއް ކަމަށެވެ.

އެ ބަޔާނުގައި ފާހަގަކޮށްފައިވާ ގޮތުގައި މި މަޝްރޫއުގެ އަމާޒަކީ ހއ. ހދ. ށ، ނ. އަދި ވަށައިގެންވާ ރަށްރަށަށް ހިދުމަތް ލިބޭނެހެން ކުޅުދުއްފުށީގައި އުތުރުގެ ރަށްރަށަށް ހާއްސަކޮށް، ލޮޖިސްޓިކަލް ހަބެއް ތަރައްގީ ކުރުމެވެ.

އަދި އެކި ފިޔަވަހި ތަކަށް ބަހާލައިގެން ކުރިއަށް ގެންދިޔުމަށް ހަމަޖެހިފައިވާ މި މަޝްރޫއުގެ ދަށުން، ކުޅުދުއްފުށީ ބަނދަރުގެ ކެޕޭސިޓީ އިތުރުކޮށް، ކާގޯ ހޭންޑްލިން ސިސްޓަމްތައް، ޒަމާނީ ފެންވަރަށް ތަރައްގީ ކުރުމަށާއި ރައްޔިތުންނަށް ބޭނުންވާ މުދަލުގެ ބާވަތް ތަކުގެ އިތުރުން ތަރުކާރީ އާއި މޭވާ ފަދަ އަވަހަށް ހަލާކުވާ ބާވަތްތައް ތާޒާކަންމަތީ ރައްކަތެރިކަމާ އެކު ބެހެއްޓޭނެ ވަސީލަތްތައް ގާއިމު ކުރުމަށް ރޭވިފައިވާ ކަމަށް ވެސް ބަޔާނުގައިވެ އެވެ.

މިނިސްޓްރީގެ ބަޔާނުގައި ބުނެފައި ވަނީ ކުޅުދުއްފުށި ބަނދަރު އެކްސްޓެންޑު ކުރުމުގެ މަޝްރޫއު ފަށައިގަތުމަށް ސޮއި ކުރެވުނު މި އެއްބަސްވުމަކީ ރާއްޖޭގެ އުތުރުން ފަށައިގެން ދެކުނަށް، ޝެޑިއުލް ކުރެވިގެން އަތޮޅު ތެރެއަށް މުދާ އުފުލޭނެ ނިޒާމެއް ގާއިމު ކުރުމަށް އެޅުނު ފުރަތަމަ ފިޔަވަޅު ކަމަށެވެ.

އޭގެ އިތުރުން ސަރުކާރުގެ އަމާޒަކީ އަތޮޅު ތެރޭގެ ސަޕްލައި ޗެއިންގެ އެފިޝިއެންސީ އިތުރުކޮށް، މުދާ ގެނައުމުގައި ކުރާން ޖެހޭ ހަރަދު ކުޑަކޮށް، ހެޔޮ އަގެއްގައި އަތޮޅު ތަކަށް މުދާ އެތެރެ ކުރެވި، ރާއްޖޭގެ އިގުތިސާދު ކުރިއަރައިގެން ދިޔުމަށް ފަހި ފުރުސަތު ތަކެއް ހޯދައިދިނުން ކަމަށް ބަޔާނުގައި ފާހަގަ ކޮށްފައިވެ އެވެ.

މިނިސްޓްރީން އިތުރަށް ބުނީ މި މަޝްރޫއުގެ ސަބަބުން ރާއްޖޭގެ އިގުތިސާދު ލާމަރުކަޒުކޮށް، ދިގު މުއްދަތުގެ ވިލުންތެރިކަން ހޯދައިދިނުމަށް ފިޔަވަހި ތަކަކަށް ބަހާލައިގެން އުމްރާނީ ތަރައްގީގެ މަޝްރޫއުތައް، ހިންގުމަށް ސަރުކާރުންދޭ އަހައްމިއްޔަތުކަން ދައްކުވައިދޭ ކަމަށެވެ.