ދައުލަތަށް ހިދުމަތް ކުރުމުގެ އިނާމަށް 141 ބޭފުޅުން ނަން ހުށަހަޅުއްވައިފި

ދިވެހި ދައުލަތަށް ހިދުމަތް ކުރުމުގެ އިނާމަށް މި އަހަރު 141 ބޭފުޅުން ފޯމު ހުށަހަޅުއްވައިފި ކަމަށް ގައުމީ އިނާމާބެހޭ ކޮމިޓީން ބުނެފި އެވެ.

އިނާމަށް ނަން ހުށަހެޅުމުގެ މުއްދަތު ހަމަވީ، މި އަހަރުގެ މާޗު މަހުގެ 18 ވަނަ ދުވަހު އެވެ. އިނާމަށް ހުށަހެޅުއްވި ބޭފުޅުން ހުށަހެޅުއްވި ވަޒީފާގެ ލިޔުންތައް ކޮމިޓީން މިހާރު ވަނީ ބައްލަވައި، އޭގެ ތެރެއިން އިންޓަވިޔުއަށް ޝަރުތު ހަމަވާ ބޭފުޅުން ކަނޑައަޅުއްވާފަ އެވެ.

އެ ބޭފުޅުންނާ ކޮމިޓީން މިއަދު ވަނީ އިންޓަވިޔު ކުރައްވަން ފަށްޓަވާފަ އެވެ.

ދައުލަތަށް ހިދުމަތް ކުރުމުގެ އިނާމަކީ، ދިވެހި ދައުލަތަށް 35 އަހަރަށްވުރެ، ދިގު މުއްދަތަކަށް ހިދުމަތް ކުރައްވާފައިވާ މުވައްޒަފުންގެ ތެރެއިން، މަގާމުގެ މަސްއޫލިއްޔަތު އަދާ ކުރުމާ އެކު، ގާބިލު ކަމާއި، އިހުލާސްތެރިކަމާ އެކުގައި ކޮށްފައިވާ ހިދުމަތްތަކަށާއި، އެ މުއައްސަސާ އަކަށް ކޮށްދީފައިވާ ހިދުމަތް ތަކުގެ އަގު ވަޒަން ކުރުމުގެ ގޮތުން ގައުމީ ފެންވަރުގައި ދައުލަތުން ރައީސުލްޖުމްހޫރިއްޔާ ދެއްވާ ޝަރަފުވެރި އިނާމެކެވެ.

ދިވެހި ދައުލަތަށް ހިދުމަތް ކުރުމުގެ އިނާމުގެ ގޮތުގައި ރައީސުލްޖުމްހޫރިއްޔާ ދެއްވަނީ އައްޑަނަ އަކާއި، ޝަރަފުގެ ބެޖަކާއި، ހަނދާނީ ލިޔުމެކެވެ.

ރައީސް އޮފީސް