ޓެރެރިޒަމަށް ފުލުހުން ހޭލުންތެރިކުރުވުމަށް ޕްރޮގްރާމެއް

ފުލުހުންގެ ފަސް ރީޖަނަށް އަމާޒުކޮށްގެން ކުރިއަށްގެންދާ "ޓެރަރިސްޓް އިންސިޑެންޓް ފަސްޓް ރެސްޕޮންސް އެވެއާނަސް" ޕްރޮގްރާމާއި "ޓެރަރިސްޓް އިންސިޑެންޓް ކޮމާންޑު ރެސްޕޮންސް އެވެއާނަސް'' ޕްރޮގްރާމް ނޯތު ސެންޓްރަލް ޕޮލިހުގެ މުވައްޒަފުންނަށް ކުރިއަށް ގެންގޮސްފި އެވެ.

މި ޕްރޮގްރާމް ކުރިއަށް ގެންގޮސްފައި ވަނީ މި މަހުގެ 12 އިން 15 އަށް އދ. މަހިބަދޫގަ އެވެ.

މި ޕްރޮގްރާމުގައި، ރާއްޖެއަށް ނިރުބަވެރި ހަމަލާއެއް އަންނަ ހާލަތުގައި އެ ކަމަށް ހުޝިޔާރުވެ ތިބުމާއި ފާރަވެރިކަމާ އެކު އެ ކަމަށް ރެސްޕޯންޑު ކުރެވޭނެ ގާބިލުކަން ފުލުހުންގެ ކިބައިގައި އިތުރު ކުރުމަށް މައުލޫމާތު ދީފައިވެ އެވެ.

އޭގެ އިތުރުން އެ ފަދަ ހާދިސާއެއް ކުރިމަތިވެއްޖެ ހާލަތުގައި، ރާއްޖޭގެ މީހުން ދިރިއުޅޭ ރަށްރަށާއި ރިސޯޓުތަކާ އަދި ސިނާއީ މަސައްކަތް ކުރާ ރަށްރަށާ އެންމެ ގާތުން އެ ކަމަށް އިޖާބަދޭ ފަސްޓް ރެސްޕޯންޑާޒް އަދި ސުޕަވައިޒަރީ ލެވެލް ތަކުގެ ފުލުހުން އަމަލު ކުރާނެ ގޮތް ތަކާއި އެ ފަދަ ސީން ތަކުގައި ހަރަކާތްތެރި ވާނެ ގޮތް ތަކުގެ އިތުރުން ސަމާލުކަން ދޭން ޖެހޭ ކަންކަމުގެ މައުލޫމާތު ދީފައިވެ އެވެ.

މި ޕްރޮގްރާމުގެ ސަބަބުން، ޓެރަރިޒަމާ ދެކޮޅަށް ދިވެހި ފުލުހުން ކުރަމުންދާ މަސައްކަތް ތަކަށް ރެސްޕޯންޑު ކުރުމުގެ ގާބިލުކަން، އަތޮޅު ތެރޭގައި މަސައްކަތްކުރާ ފުލުހުންގެ ކިބައިގައި އިތުރުވެގެންދާނެ ކަމަށް ފުލުހުން ބުންޏެވެ.

މި ޕްރޮގްރާމަކީ ފުލުހުންގެ ކައުންޓާ ޓެރަރިޒަމް އިންޓެލިޖެންސް އަދި އިނގިރޭސިވިލާތުގެ ސަރުކާރު ގުޅިގެން ހިންގަމުންދާ "އިންޓަނޭޝަނަލް ޕްރޮޓެކްޓް އެންޑް ޕްރިޕެއާ" ޕްރޮގްރާމްގެ ދަށުން، މުޅި ރާއްޖެ ހިމެނޭހެން ކުރިއަށް ގެންދިއުމަށް ހަމަޖެހިފައިވާ ޕްރޮގްރާމެކެވެ.