ކާޑެއްދޫ އެއާޕޯޓަށް ކުރިމަތިވި ހުވަނީ އުނދަގޫ ހައްލުކުރުމަށް ފަންނީ އެހީތެރިކަން ދީފި

ކާޑެއްދޫ އެއާޕޯޓުގައި ހުވަނި އަޅާފައި -- ފޮޓޯ/ މިހާރު

ގދ. ކާޑެއްދޫ އެއާޕޯޓަށް ކުރިމަތިވެފައިވާ ހުވަނީގެ މައްސަލަ ހައްލުކުރަން ބޭނުންވާ ފަންނީ އެހީތެރިކަން ފޯރުކޮށްދީފައިވާ ކަމަށް ދަނޑުވެރިކަމާ ބެހޭ މިނިސްޓްރީން ބުނެފި އެވެ.

އެ މިނިސްޓްރީން ބުނީ ކާޑެއްދޫ އެއާޕޯޓުގައި ހުވަނި ގިނަވެ، އެކަން ކޮންޓްރޯލު ކުރުމަށް އެހީއަށް އެދި، އެ އެއާޕޯޓުން ސިޓީއެއް ނުވަތަ މެއިލްއެއް ވެސް އައިސްފައިނުވާ ކަމަށާއި މިނިސްޓްރީގެ ސަމާލު ކަމަށް މިކަން އައީ ސޯޝަލްމީޑިއާގެ ޒަރީއާއިން ކަމަށެވެ.

އެހެންކަމުން މި މައްސަލަ ސަމާލު ކަމަށް އައުމާ އެކު، މިނިސްޓްރީގެ ފަރާތުން އެއާޕޯޓަށް ގުޅައި، މީގެ ކުރިން އެކޮޅުން އަމަލުކޮށްފައިވާ ގޮތް ބަލައި، އިތުރަށް ކުރެވިދާނެ ކަންކަމާ ގުޅޭ ގޮތުގެ މައުލޫމާތު ދީފައިވާނެ ކަމަށް މިނިސްޓްރީން ބުންޏެވެ. އަދި ހުވަނި ކޮންޓްރޯލް ކުރުމާ ބެހޭ ފަންނީ މައުލޫމާތު ކަރުދާސް އެއާޕޯޓަށް މެއިލްކޮށްފައިވާ ކަމަށް ވެސް ބުންޏެވެ.

މީހުން ދިރިއުޅޭ ރަށްރަށުގައި ހުވަނި ކޮންޓްރޯލް ކުރުމަކީ ރަށު ކައުންސިލްގެ ޒިންމާ އެއްކަން ފާހަގަކޮށް މިނިސްޓްރީން ބުނީ ނަމަވެސް އެ ކަމަށް ބޭނުންވާ ފަންނީ އެހީތެރިކަން އެ މިނިސްޓްރީން ފޯރުކޮށްދޭނެ ކަމަށެވެ.

ދަނޑުވެރިކަމާއި ބެހޭ ވުޒާރާ