މައްކާ ރޫޓު ތަންފީޒު ކުރަން ސައުދީ ވަފުދުން މަޝްވަރާކޮށްފި

ސައުދީ ވަފުދުން ކަމާބެހޭ ފަރާތްތަކާ ބައްދަލު ކުރައްވަނީ -- ފޮޓޯ/ އިސްލާމިކް މިނިސްޓްރީ

މައްކާ ރޫޓު ތަންފީޒު ކުރުމުގެ ތައްޔާރީ ތަކަށް ރާއްޖެ ވަޑައިގެންނެވި ސައުދީ އަރަބިއްޔާގެ ވަފުދުން ރާއްޖޭގެ ކަމާގުޅޭ މުއައްސަސާތަކާ ބައްދަލު ކުރައްވައިފި އެވެ.

މި ބައްދަލު ކުރެއްވުން އޮތީ މިއަދު ހެނދުނު އިސްލާމީ މަރުކަޒުގެ ޖަލްސާ ކުރާ މާލަމުގަ އެވެ.

މިއަދު ކުރިއަށް ދިޔަ މި ބައްދަލު ކުރެއްވުމުގައި އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އާއި ރާއްޖެގެ ހައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލް އާއި އިމިގްރޭޝަން ކޮންޓްރޯލާ ރިޓަޔާޑް މުޙައްމަދު ފަސީހު ބައިވެރިވެވަޑައިގެންނެވި އެވެ.

މި ބައްދަލު ކުރެއްވުމުގައި ބައިވެރިވެވަޑައިގަތް އިތުރު ބޭފުޅުންގެ ތެރޭގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑާއި އޭވިއޭޝަން ސެކިއުރިޓީ ކޮމާންޑާއި މޯލްޑިވްސް ކަސްޓަމްސް ސާވިސް އާއި މި އަހަރު ދިވެހި ހައްޖުވެރީން ދަތުރު ކުރާ މޯލްޑިވިއަންގެ އިތުރުން ސައުދީ އެއާލައިންގެ އިސް ބޭފުޅުން ވެސް ބައިވެރިވެލައްވާފައިވެ އެވެ.

މި ބައްދަލު ކުރެއްވުމުގައި މިނިސްޓަރު ޝަހީމް ވަނީ ހާއްސަ ޕްރެޒެންޓޭޝަނެއް ދެއްވާފަ އެވެ. މީގެ އިތުރުން ހައްޖުގެ ތައްޔާރީ ތަކާ ގުޅޭ ގޮތުން ހައްޖު ކޯޕަރޭޝަނުން ވެސް މައުލޫމާތު ދެއްވި އެވެ.

ރާއްޖޭގައި މައްކާ ރޫޓު އިނީޝިއޭޓިވް ރަސްމީކޮށް ފެއްޓެވުމަށް ހަމަޖެހިފައި ވަނީ ދިވެހި ހައްޖުވެރިންގެ ފުރަތަމަ ފުލައިޓު ފުރާ ދުވަސްކަމަށްވާ މި މަހުގެ 26 ވަނަ ދުވަހު ވެލާނާ އިންޓަނޭޝަނަލް އެއާޕޯޓުގަ އެވެ.

އިސްލާމިކް މިނިސްޓްރީ