ސުޕްރީމް ކޯޓުގެ ފަނޑިޔާރު ކަމުގެ މަގާމަށް ކުރިމަތިލާން ހުޅުވާލައިފި

ހުސްވެފައިވާ ސުޕްރީމް ކޯޓުގެ ފަނޑިޔާރު ކަމުގެ މަގާމަށް ކުރިމަތިލުމުގެ ފުރުސަތު ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު ހުޅުވައިލައިފި އެވެ.

ސުޕްރީމް ކޯޓުގެ ފަނޑިޔާރު ކަމަށް ކުރިމަތިލާން ޖޭއެސްސީން މިއަދު ހުޅުވައިލީ އެ ކޯޓުގެ ފަނޑިޔާރުންގެ ގޮތުގައި ތިއްބެވި ޑރ. އަޒްމިރަލްދާ އާއި މަހާޒު ވަކި ކުރުމުންނެވެ.

ޖޭއެސްސީން ކުރި އިއުލާނެއްގައި ބުނެފައި ވަނީ ފަނޑިޔާރު ކަމަށް ކުރިމަތިލާން އެދޭ ފަރާތް ތަކަށް، އެ ފުރުސަތު މިމަހުގެ 22 ވަނަ ދުވަހުގެ މެންދުރު 12:00 އާ ހަމައަށް ހުޅުވައިލައިފާވާ ކަމަށެވެ.

ސުޕްރީމް ކޯޓުގެ ފަނޑިޔާރު ކަމަށް ކުރިމަތިލާ ފަރާތްތަކުގެ ކިބާގައި ހުންނާންޖެހޭ ޝަރުތަކަކީ އުމުރުން 30 އަހަރުވެފައި ވުން، ގާނޫނީ ނުވަތަ އިސްލާމީ ޝަރީއާގެ ރޮންގުން ފުރަތަމަ ޑިގުރީ ހާސިލު ކޮށްފައި ވުން، ދާއިރާގައި ހަތް އަހަރު ދުވަހުގެ ތަޖުރިބާ ލިބިފައި ވުމެވެ. މީގެ އިތުރު ޝަރުތުތައް ވެސް އެ އިއުލާނުގައި ބަޔާންކޮށްފައިވެ އެވެ.

ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން ސުޕްރީމް ކޯޓު ފަނޑިޔާރުން