މައްކާ ރޫޓް އިނީޝިއޭޓިވްގެ އިސް ވަފުދެއް ރާއްޖެ ވަޑައިގަންނަވައިފި

މައްކާ ރޫޓް އިނީޝިއޭޓިވްގެ ވަފުދުން އިސްލާމިކް މިނިސްޓަރު ޑރ. ޝަހީމާ ބައްދަލުކުރައްވަނީ – ފޮޓޯ/ އިސްލާމިކް މިނިސްޓްރީ

ރާއްޖެއިން ހައްޖަށް ދާ ހައްޖުވެރީންނަށް މުޅިން އަލަށް ތައާރަފުކުރާ މައްކާ ރޫޓް އިނީޝިއޭޓިވްގެ ޚިދުމަތް ދެއްވުމަށް ސައުދީ އަރަބިއްޔާގެ އިސް ވަފުދެއް މިއަދު ރާއްޖެ ވަޑައިގަންނަވައިފި އެވެ.

އިސްލާމިކް މިނިސްޓްރީން ބުނީ މިއަދު ރާއްޖެ އައީ މައްކާ ރޫޓް އިނީޝިއޭޓިވްގެ ހިދުމަތް ދެއްވުމުގެ މަސައްކަތުގެ އެޑްވާންސް ޓީމު ކަމަށެވެ. މި ވަފުދަށް ވެލާނާ އިންޓަނޭޝަނަލް އެއާޕޯޓުން މަރުހަބާ ދެންނެވީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އާއި އެ މިނިސްޓްރީގެ އޮފިޝަލުން ކަމަށެވެ.

މި ވަފުދުގައި ސައުދީގެ ހައްޖު މިނިސްޓްރީގެ ބޭފުޅުންނާއި، އެ ގައުމުގެ ފޮރިން މިނިސްޓްރީގެ ބޭފުޅުންނާއި ސައުދީ އިމިގްރޭޝަންގެ ބޭފުޅުން، އަދި ކަމާ ގުޅުން ހުރި މުއައްސަސާތައް ހިމެނޭ ކަމަށް ވެސް މިނިސްޓްރީން ބުންޏެވެ.

އެ މިނިސްޓްރީން ބުނި ގޮތުގައި މި ވަފުދުން މައްކާ ރޫޓު އިނީޝިއޭޓިވް ރާއްޖޭގައި ތަންފީޒު ކުރުމަށް ކުރާން ޖެހޭ މަސައްކަތްތައް ކުރައްވާ ގޮތަށް ހަމަޖެހިފައިވެ އެވެ.

މައްކާ ރޫޓް އިނީޝިއޭޓިވް ރާއްޖޭގައި ފެއްޓެވުމަށް ހަމަޖެހިފައި ވަނީ ދިވެހި ހައްޖުވެރީންގެ ފުރަތަމަ ފުލައިޓު ފުރާ ދުވަސް ކަމަށްވާ މި މަހުގެ 26 ވަނަ ދުވަހު އެވެ.

މައްކާ ރޫޓް އިނީޝިއޭޓިވްގެ މަސައްކަތް ތަކަށް ސައުދީގެ 26 ބޭފުޅުންގެ ވަފުދެއް ރާއްޖެ ވަޑައިގަންނަވާ ގޮތަށް ވަނީ ހަމަޖެހިފަ އެވެ.

އިސްލާމިކް މިނިސްޓްރީ