މިނިސްޓަރު އަމީންގެ އިތުބާރު ނެތް ކަމަށް ފާހެއް ނުވި

ޓްރާންސްޕޯޓް މިނިސްޓަރު މުޙައްމަދު އަމީނަށް އިތުބާރު އޮތް ކަމަށް ރައްޔިތުންގެ މަޖިލީހުގެ މިއަދުގެ ޖަލްސާގައި ފާސްކޮށްފި އެވެ.

އެމްޑީޕީގެ 12 މެމްބަރުން ސޮއިކުރައްވާ ހުށަހެޅި މައްސަލައިގައި އަމީންގެ އިތުބާރު އޮތް ކަމަށް ފާސްވީ ޕީއެންސީގެ 54 މެންބަރުން އެ މަނިކުފާނަށް އިތުބާރު އޮތް ކަމަށް ވޯޓު ދެއްވުމުންނެވެ. އަމީނަށް އިތުބާރު ނެތް ކަމަށް ވޯޓު ދެއްވީ އިދިކޮޅު އެމްޑީޕީއަށް ނިސްބަތްވެވަޑައިގަންނަވާ 11 މެންބަރަކު އެކަންޏެވެ.

އަމީންގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅީ އެމްޑީޕީގެ 11 މެންބަރުންގެ ސޮޔާ އެކު އެވެ.

މިނިސްޓަރު އަމީނަށް އިތުބާރު ނެތް ކަމަށް އެމްޑީޕީން މަޖިލީހަށް ހުށަހެޅީ މިދިޔަ މަހުގެ 18 ވަނަ ދުވަހުގެ ރޭ ހ. ފެންޓެނޯއީ ގޭގެ ނުވަވަނަ ބުރިން ހައްވާ ޔުމްނު ރަޝީދު ވެއްޓުނު ހާދިސާގެ ތަހުގީގަށް ނުފޫޒު ފޯރުވި ކަމަށް ކުރެވޭ ތުހުމަތުތަކާ ގުޅުވައިގެންނެވެ.

މި ތުހުމަތު ތަކަށް މިއަދު މަޖިލީހުގައި ޖަވާބުދާރީވަމުން މއ. މާންދޫގޭދެކުނުގެ އަކީ އެ މަނިކުފާނާއި އެމަނިކުފާނުގެ އެއްބަނޑު ތިން މީހެއްގެ ނަމުގައިވާ ތަނެއް ކަން ފާހަގަ ކުރައްވަމުން ވިދާޅުވީ އެންމެންގެ ތަނެއްގައި ހިނގާ ކަމެއްގެ ޒިންމާ ވަކި މީހަކު ނަގަން ޖެހޭނެ ކަމަށް ގަބޫލުފުޅު ނުކުރައްވާ ކަމަށެވެ.

އަމީން ވިދާޅުވީ ވަކި ބައެއްގެ މަސްލަހަތު ހިމާޔަތް ކުރުމަށް ފުލުހުންނަށް ނުފޫޒު ފޯރުވައިފައި ނޯންނާނެ ކަމަށެވެ. އަދި އެމްޑީޕީން ކުރާ ތުހުމަތު ތަކަކީ އެއްވެސް ހަގީގަތެއް ނެތް ތުހުމަތު ތަކެއް ކަމަށް ވެސް އެ މަނިކުފާނު ވިދާޅުވި އެވެ.

އަމީން މަޖިލިސް