ރިޔާސީ އިންތިހާބުގެ ވޯޓަކީ ޕްރިފަރެންޝަލް ވޯޓިން ނިޒާމަކަށްވުމަށް ވަކާލާތު ކުރާނަން: ރައީސް

ޕޮޑްކާސްޓުގެ ހަވަނަ އެޕިސޯޑުގެ ސުވާލުތަކަށް ރައީސް ޖަވާބު ދެއްވަނީ -- ފޮޓޯ/ ރައީސް އޮފީސް

ރިޔާސީ އިންތިހާބުގެ ވޯޓަކީ ޕްރިފަރެންޝަލް ވޯޓިން ނިޒާމުގެ ތެރެއިން ބައްޓަން ކުރެވޭ ވޯޓަކަށްވުމަށް ވަކާލާތު ކުރައްވާ ކަމުގައި ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ރައްޔިތުންނާއެކު ޕޮޑްކާސްޓުގެ ހަވަނަ އެޕިސޯޑުގައި ވާހަކަފުޅުދައްކަވަމުން ރައީސް ވިދާޅުވީ ޕްރިފަރެންޝަލް ވޯޓިންގް ނިޒާމަކަށް ބަދަލުކޮށްފި ނަމަ، މިހާރު އޮންނަ ގޮތަށް، ދެ ވަނަ ބުރުގެ ވޯޓަކަށް ދާންނުޖެހޭނެ ކަމަށެވެ. އަދި މިކަންކަން މި ގޮތަށް ނިންމުމުން ހަރަދު ކުޑަވެ، އެފިޝަންސީ އިތުރުވާ ކަމަށާއި، ނަމަވެސް މިކަން ނިންމާނީ ސަރުކާރުގެ ތެރޭގައި ފުޅާ ދާއިރާއެއްގައި މަޝްވަރާ ކުރައްވައިގެން ކަމަށް އެ މަނިކުފާނު ވިދާޅުވި އެވެ.

އޭގެ އިތުރުން ޕްރިފަރެންޝަލް ވޯޓިން ނިޒާމުގެ ސަބަބުން، އެންމެ ގިނަ ރައްޔިތުންގެ ބައިވެރިވުމާ އެކީގައި، އެ ރައްޔިތުން ބޭނުންވާ ކެންޑިޑޭޓަކު ހޮވުމުގެ ފުރުސަތު މާބޮޑުވާ ކަމަށް ގަބޫލު ކުރައްވާ ކަމުގައި ވެސް ރައީސްގެ ވާހަކަފުޅުގައި ފާހަގަ ކުރެއްވި އެވެ.

ރައީސް ވިދާޅުވީ ހަގީގީ މާނާގައި ރައްޔިތުން ބާރުވެރި ކުރެވިގެންދާނީ އިންތިހާބީ މަގާމު ތަކުގައި ތިއްބެވި ބޭފުޅުން އެ މަގާމު ތަކުން ދުރު ކުރުމުގެ ބާރުވެސް، ރައްޔިތުންގެ އަތް މައްޗަށް ލިބުމުން ކަމަށެވެ.

އެ މަނިކުފާނުގެ ވާހަކަފުޅުގައި، ވަކި ގައުމެއްގައި ކަން ކުރާ އުސޫލުން ކަންކަން ކުރަން ނުޖެހޭ ކަމަށާ، އެއަށްވުރެ މާ ރަނގަޅަށް، ސީދާ ރައްޔިތުންގެ ބާރުވެރިކަން ވަރު ގަދަ ކުރެވި، ޔަގީން ކަމާއި ކަށަވަރުކަން އިތުރުވާ ގޮތަށް ކަންކަން ބައްޓަން ކުރެވޭނެ ކަމުގައި ވިދާޅުވި އެވެ.

ރައީސް ޑރ މުޢިއްޒު