ކޮންމެ ވެރިކަމަކުން ވެސް ފަނޑިޔާރުން ބަދަލުކުރި، މިއީ ވަރަށް ދެރަ ކަމެއް: ނަޝީދު

ވެރިކަން ބަދަލުވާ ކޮންމެ ފަހަރަކު ފަނޑިޔާރުން ބަދަލުކުރުމަކީ ވަރަށް ދެރަ ކަމެއް ކަމުގައި ކުރީގެ ރައީސް މުޙައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު މިހެން ވިދާޅުވީ ސުޕްރީމް ކޯޓުގެ ފަނޑިޔާރުކަމުން މަހާޒު އަލީ ޒާހިރު އާއި ޑރ. އަޒްމިރަލްދާ ޒާހިރު ވަކިކުރަން ރައްޔިތުންގެ މަޖިލީހުން މިއަދު ފާސްކޮށްފައިވަނިކޮށެވެ.

އެ މަނިކުފާނު އެކްސްގައި ކުރެއްވި ޕޯސްޓެއްގައި ވިދާޅުވީ ވެރިކަން ބަދަލުވާ ކޮންމެ ފަހަރަކު ފަނޑިޔާރުން ބަދަލު ކުރަންޖެހޭ ކަމަށް އަލަށް އަންނަ ވެރީންގެ ހިތަށް ވަންނަ ކަމީ ވަރަށް ބޮޑު ދެރަ ކަމެއް ކަމަށެވެ.

ރައީސުލްޖުމްހޫރިއްޔާ ބޭނުންފުޅުވާ އިރަށް ފަނޑިޔާރުން ބަދަލު ކުރުމަކީ ފެހި ގާނޫނު އަސާސީ ތަސައްވަރު ކުރި ގޮތް ނޫންކަން ފާހަގަ ކުރައްވާ އެމަނިކުފާނު ވިދާޅުވީ އެހެނަސް މި ގާނޫނު ބައްޓަން ކޮށްފައި މިވަނީ އުއްމީދު ކުރި ގޮތާ ހިލާފަށް ރަސްކަމެއް ފަދަ ރިޔާސީ ނިޒާމެއް ކަމަށެވެ.

ރައީސް ނަޝީދު ވިދާޅުވީ 2008 ގައި އައު ގާނޫނު އަސާސީއަށް އަމަލު ކުރާން ފެށުމާއެކު، އައު ސުޕްރީމް ކޯޓު އެކުލަވާލަން ޖެހުނު ކަމަށެވެ. އަދި އޭގެ ފަހުން 2013 އާއި 2018 އަދި 2023ގެ އިންތިހާބު ތަކަށް ފަހުގައި ކޮންމެ ވެރިކަމަކުން ވެސް ފަނޑިޔާރުން ބަދަލުކޮށްފައިވާ ކަމަށް އެމަނިކުފާނު ވިދާޅުވީ އެވެ.

"އެއީ ވަރަށް ބޮޑު ދެރައެއް، އަދި ގޯހެއް، މިކަން މިހެން ނުވާނެ ގޮތަކަށް ނިޒާމު ބަދަލު ކުރަންޖެހޭ،" ރައީސް ނަޝީދު ވިދާޅުވި އެވެ.

ރާއްޖޭގައި ވެރިކަން ހިންގުމަށް އެންމެ ރަނގަޅު ނިޒާމަކީ ބަރުލަމާނީ ނިޒާމު ކަމަށް ރައީސް ނަޝީދު އަބަދުވެސް ގަބޫލު ކުރައްވަ އެވެ. އެގޮތުން ބޭނުން ވަނީ ރާއްޖޭގައި އޮތް ރިޔާސީ ނިޒާމު، ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރަށް ވެވަޑައިގަންނަވަން ކަމަށް އެ މަނިކުފާނު މީގެ ކުރިން ވިދާޅުވެފައިވެ އެވެ.