ވަންދޫގައި ނުރައްކާތެރި ކުނި ރައްކާކުރާ މަރުކަޒެއް ގާއިމުކުރުމަށް ސޮއިކޮށްފި

ރ. ވަންދޫގައި ހުންނަ ސަރަހައްދީ ކުނި މެނޭޖު ކުރާ މަރުކަޒުގެ ތެރޭގައި ނުރައްކާތެރި ކުނި ރައްކާކުރާ ވަގުތީ މަރުކަޒެއް ޑިޒައިންކޮށް، އިމާރާތް ކުރުމަށް ޓޫރިޒަމް މިނިސްޓްރީން ބަޔަކާ ހަވާލުކޮށްފި އެވެ.

އެ މިނިސްޓްރީން މި މަސައްކަތުގެ އެއްބަސްވުމުގައި ސޮއި ކުރީ ވީ އަވާ އިންވެސްޓްމަންޓް ޕްރައިވެޓް ލިމިޓެޑާ އެކުގަ އެވެ. މުޅިއެކު 10 މަސްދުވަހުގެ ތެރޭގައި ނިންމުމަށް ހަވާލުކުރި އެ މަޝްރޫއުގެ އަގު މިނިސްޓްރީން ހާމައެއް ނުކުރެ އެވެ.

މިއީ ރާއްޖޭގައި ކުނި މެނޭޖު ކުރުމުގެ ނިޒާމު ހަރުދަނާ ކުރުމަށް ސަރުކާރުން ކުރިއަށްގެންދާ މަސައްކަތް ތަކުގެ ތެރެއިން އެއް މަސައްކަތްކަން ފާހަގަކޮށް، ޓޫރިޒަމް މިނިސްޓްރީން ބުނީ މި މަރުކަޒު ގާއިމު ކުރުމުން، ނުރައްކާތެރި ކުނި ރައްކާތެރިކަމާއެކު ގެންގުޅެ، ރައްކާކޮށް، އަދި ނައްތާލުމަށް މަގުފަހިވެގެންދާނެ ކަމަށެވެ.

ޓޫރިޒަމް މިނިސްޓްރީން ބުނި ގޮތުގައި މި މަޝްރޫއަކީ ތިމާވެށި ހިމާޔަތް ކުރުމަށާއި، ރައްޔިތުންގެ ސިއްހަތު ރައްކާތެރި ކުރުމަށް އެޅޭ މުހިންމު ފިޔަވަޅެކެވެ. އަދި މި މަރުކަޒު ގާއިމު ކުރުމުން ރ. އަތޮޅާއި އެ ސަރަހައްދުގެ އެހެން އަތޮޅު ތަކުގެ ނުރައްކާތެރި ކުނި މެނޭޖު ކުރުމަށް ފަސޭހަ ވެގެން ދާނެ ކަމަށް ވެސް ބުންޏެވެ.

މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް