"ކުދިންގެ ފުށުން ފެންނަ އިންޒާރުގެ ނިޝާންތައް ދެނެގަނެ އެކަމަށް އަވަސް އިޖާބައެއް ދޭންޖެހޭ"

ސުކޫލްތަކާއި މައިންބަފައިން އަދި އަދުލު އިންސާފު ގާއިމު ކުރާ މުވައްސަސާ ތަކުން ވެސް ކުދިންގެ ފަރާތުން ފެންނަ އިންޒާރުގެ ނިޝާންތައް ދެނެގަނެ އެ ކަމަށް އަވަސް އިޖާބައެއް ދިނުމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ގޮވައިލައްވައިފި އެވެ.

އެ ކަމަނާ މި ކަމަށް ގޮވައިލެއްވީ ޕީޖީ އޮފީހާއި ޔުނިސެފް ގުޅިގެން މި މަހުގެ 10 އިން 12 އަށް ބާއްވާ، ނޭޝަނަލް ޖުވެނައިލް ޖަސްޓިސް ކޮންފަރެންސް ޝަރަފުވެރި ކޮށްދެއްވައި ވާހަކަފުޅު ދައްކަވަމުންނެވެ.

މެޑަމްގެ ވާހަކަފުޅުގައި މިއަދު ކުށުގެ މާހައުލުގައި ތިބި ކުދިންނަކީ އިއްޔެ އަނިޔާ ލިބެމުންދިޔަ ނުވަތަ ވިކްޓިމުންގެ ގޮތުގައި ތިބި ކުދިންކަމުގައި ވުމުން، ކުޑަކުދިންގެ އަދުލުގެ ނިޒާމާބެހޭ ކަންކަން ނިންމާއިރު މި ހަގީގަތް ގަބޫލު ކުރަން ވާނެ ކަމަށް ވިދާޅުވި އެވެ.

ހަގީގީ ހާދިސާތަކުން މިސާލު ޖައްސަވައި އެ ކަމަނާ ވަނީ، މަރުގެ މައްސަލައެއްގައި ހައްޔަރު ކުރެވުނު 14 އަހަރުގެ ކުއްޖެއް، އޭނާ ހައްޔަރު ކުރުމުގެ ކުރިން 191 ފަހަރު ކަމާބެހޭ އިދާރާތަކާ މުއާމަލާތް ކުރެވިފައިވާ މައްސަލަ އަކާއި، މީގެ އިތުރުން ގިނަ ދުވަސްތަކެއް ވަންދެން ޖިންސީ ގޯނާ ތަހައްމަލު ކުރަމުން އައި 15 އަހަރުގެ ކުއްޖަކަށް ދައުވާ ކުރެވުނު މައްސަލަ އެއްގައި އެތެރެއިންނާއި ރާއްޖެއިން ބޭރުން އައި ޕްރެޝަރާއެކު އެ ކުއްޖާ މިނިވަންވި މައްސަލައެއްގެ ވާހަކަ ހިއްސާ ކުރައްވާފަ އެވެ.

މި މައްސަލަ ތަކުން ރަމްޒުކޮށް ދެނީ ކުދިންގެ ރައްކާތެރި ކަމަށާއި އަވަސް ފިޔަވަޅު އެޅުމުގައި ނިޒާމީ ގޮތުން ފެއިލްވެފައިވުން ކަމަށް އެ ކަމަނާ ވިދާޅުވި އެވެ.

އެ ކަމަނާގެ ވާހަކަފުޅުގައި، މި ސަރަހައްދުގެ އެހެން ގައުމުތަކާ އަޅައިބަލާއިރު، ރާއްޖޭގައި އަނިޔާވެރި ކުށްތައް މަދުވެފައި، ޖަލު ބަންދަށް ގެންދާ ނިސްބަތް މަތިކަމުގައި ވިދާޅުވި އެވެ. އަދި ސިޔާސަތު ހަރުދަނާ ކުރުމަށް އެތައް އަހަރު ހޭދަ ކުރި ނަމަވެސް ޒުވާން އުމުރުގައި ކުށުގެ ވެށީގައި އުޅުމުން އެ ކަމުގެ އަސަރު ޖީލު ތަކަށް ދެމިގެންދާ ކަމެއްކަން ފާހަގަ ކުރެއްވި އެވެ.

މިކަމަށް ހައްލު ހޯދުމަށް ޓަކައި ގެންގުޅޭ ވިސްނުން ބަދަލުކޮށް، އާއިލީ ބައިވެރިވުން ހަރުދަނާ ކުރުމާއި، ހާއްސަކޮށް ބައްޕައިން ޝާމިލުވާ މިންވަރު އިތުރު ކުރުމާއި، އަދި މުވައްސަސާ ތަކުގެ މެދުގައި މިހާރަށްވުރެ، ބޮޑަށް ގުޅުން ބަދަހި ކުރަންޖެހޭކަން މެޑަމް ސާޖިދާގެ ވާހަކަފުޅުގައި އިޝާރާތް ކުރެއްވި އެވެ. އަދި ނިޒާމުގައި ހުރި އެކިއެކި ފޫނުބެދޭ ކަންކަމާއި ހުރެ، ކުށުގެ ވެއްޓަށް ކުދިން ވަނުމަށް ހުރި ފުރުސަތުތައް ނައްތާލައި، އެ ކުދިން އެ ކަމުގެ ތެރެއަށް ވައްދާ ފަރާތްތައް ޖަވާބުދާރީ ނުވެ ދިއުން ހުއްޓުވުމަށް، ކަމާބެހޭ ފަރާތް ތަކުގެ ކިބައިން އެ ކަމަނާ އެދިވަޑައިގެންނެވި އެވެ.