ނޭދެވޭ ކަންކަމުން ކުދިން ދުރުކުރުވުމަށް އެންމެން އަޒުމު ކަނޑައަޅަންޖެހޭ: ރައީސް

ކޮންމެ ނޭދެވޭ ކަމަކުން ދިވެހި ހުރިހާ ކުޑަކުދިން ދުރުހެލި ކުރުވުމަށް އެންމެން އަޒުމު ކަނޑައެޅުމަށް ރައީސް ޑރ. މުޙައްމަދު މުއިއްޒު އެދިވަޑައިގެންފި އެވެ.

އެ މަނިކުފާނު މިކަމަށް އެދިވަޑައިގަތީ  މިއަދު ފާހަގަ ކުރާ ރާއްޖޭގެ ކުޑަކުދިންގެ ދުވަހުގެ މުނާސަބަތުގައި ފޮނުއްވި ހިތޯބުގަ އެވެ.

ރައީސްގެ ހިތޯބުގައި ކުޑަކުދިންނަކީ، އެންމެންގެ ހިތް ތަކުގެ ހަމަޖެހުމާއި ގައުމުގެ ދެމިއޮތުންކަން ފާހަގަ ކުރައްވައި، ޅަދަރީން ހެޔޮގޮތުގައި ބޮޑެތި ކުރުމަކީ، ފާގަތި ކުރިމަގަކަށް އޮތް އެންމެ ބޮޑު ޔަގީންކަން ކަމުގައި ވިދާޅުވި އެވެ. މީގެ އިތުރުން ހަރުދަނާ ޖީލެއްގެ ގޮތުގައި ކުޑަކުދިން ބޮޑެތި ކުރުމަށް ބާރު އަޅުއްވާފައިވެ އެވެ.

އަދި ދިވެހީންގެ ސިޔާދަތާއި ކަރާމާތާއި ތަމައްދުން ނަގަހައްޓަން ތައްޔާރަށްތިބޭ ބަޔެއްގެ ގޮތުގައި ކުދިން ތަރުބިއްޔަތު ކުރުމަކީ، އެންމެންގެ ކޮނޑުގައި އެޅިފައި އޮތް އެންމެ އިސް ގައުމީ ވާޖިބު ކަމުގައި އެ މަނިކުފާނު ފާހަގަ ކުރައްވާފައިވެ އެވެ.

ރައީސްގެ ހިތޯބުގައި، ކުޑަކުދީންނަށް ޓަކައި، ކޮންމެ ތަނަކުން ވެސް، އެކަކު އަނެކަކަށް އިހުތިރާމް ކުރާ، އަދަބު އަހުލާގުން ޒީނަތްތެރިވެފައިވާ، ރީތި މާހައުލެއް ދެއްކުމަށް ބާރުއެޅުއްވި އެވެ. ހަމައެއާއެކު ޒަމާނަށް ފެތޭނެ، މާދަމާއަށް ބޭނުން ހިފޭނެ، ތައުލީމާއި ތަމްރީނު އެ ކުދިންނަށް ހޯދައިދިނުމަށާއި، ދިވެހި ގައުމުދެކެ ލޯބިވާ، ދިވެހިވަންތަ، މުސްލިމް ދަރީން ތަކެއްގެ ކޮނޑުމަތީ މި ގައުމުގެ މަޖްދާއި ކަރާމާތް އުފުލާނެކަން ކަށަވަރު ކުރުމަށް އެ މަނިކުފާނު އިލްތިމާސް ކުރެއްވި އެވެ.

މި ހިތޯބުގައި އެ މަނިކުފާނު ވަނީ ކޮންމެ ދުވަހަކު ވެސް ބޭނުންތެރި އާ ކަންކަން ދަސް ކުރުމަށާއި، އެއް ދުވަހަށްވުރެ، ކާމިޔާބު އަނެއް ދުވަސް ހޯދަން އަޒުމު ކަނޑައެޅުމަށް ކުޑަކުދިންނަށް ނަސޭހަތްތެރިވެ ވަޑައިގެންފަ އެވެ. އަދި ފަރުޟު ފަސްނަމާދު ކުރުމާއި، ދީނަށް ހުރުމަތްތެރިކޮށް ހިތުމާއި، ދިވެހި އާދަކާދަ ތަކަށް އަހުލުވެރިވެ، ގައުމުދެކެ ލޯބިވުމަށް އެ މަނިކުފާނު ހަނދާން ކޮށްދެއްވި އެވެ.

ދުވަހުގެ މުނާސަބަތުގައި ރައީސް، މީސް މީޑިއާގައި ހިއްސާ ކުރެއްވި ޕޯސްޓުގައި ދުނިޔެއަށް އަންނަމުންދާ ހަލުވި ކުރިއެރުމާއި ބޮޑެތި ބަދަލުތަކަށް ދަރީން ހޭލުންތެރި ކުރަން ޖެހޭ ކަމުގައި ބަޔާން ކުރައްވާފައިވެ އެވެ. އަދި މާދަމާ ދިވެހި ގައުމާއިގެން ނިޔާމަ ދަތުރެއް ކުރެވޭނެ ގާބިލު ކަމާއި ހިތްވަރު ކުދިންނަށް ލިބޭނީ މިއަދު އެންމެން އެކަމަށް މަސައްކަތް ކޮށްދީގެންކަން ފާހަގަ ކުރެއްވި އެވެ.