2028 ވަނަ އަހަރާ ހަމަ އަށް ދާއިރު ސަރުކާރުގެ ތިންބައިކުޅަ އެއްބައި މުވައްޒަފުން މަސައްކަތް ކުރާނީ ގޭގައި: ރައީސް

ޑިޖިޓަލައިޒޭޝަންގެ ކަންކަން ފުރިހަމަ ވުމުން 2028 ވަނަ އަހަރާ ހަމަ އަށް ދާއިރު، ސަރުކާރުގެ ތިންބައިކުޅަ އެއްބައި މުވައްޒަފުން މަސައްކަތް ކުރާނީ ގޭގައި ތިބެގެން ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެ މަނިކުފާނު މިހެން ވިދާޅުވީ މިރޭ "ދިވެހިރާއްޖެ 2.0 ޑިޖިޓަލް ޓްރާންސްފޮމޭޝަން ސަމިޓް" އިފުތިތާހު ކޮށްދެއްވައި ވާހަކަފުޅު ދައްކަވަމުންނެވެ.

ބާސެލޯ ނަސަންދުރައިގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ފާހަގަ ކުރެއްވި ގޮތުގައި އުމްރާނީ ތަރައްގީގެ އިތުރުން މުޖުތަމައުގެ ކަންކަން ރަނގަޅުކޮށް "ގުޑް ގަވާނަންސް"ގެ ސިޔާސަތުތައް ތަންފީޒު ކުރުމުގެ މަސައްކަތް އަންނަނީ ކުރަމުންނެވެ.

"އަޅުގަނޑުގެ އުންމީދަކީ، 2028 ވަނަ އަހަރު ފެށޭ ހިސާބުން މުޅި ދައުލަތުގައި މިހާރު މަސައްކަތް ކުރަމުންދާ ގާތްގަނޑަކަށް ސާޅީސް ނުވަހާސް މުވައްޒަފުންގެ ތެރެއިން ތިންބައިކުޅަ އެއްބައި މުވައްޒަފުން، ކަނޑައެޅޭ ވަކި އުސޫލެއްގެ ތެރެއިން ވޯކް ފްރޮމް ހޯމް، ގޭގައި ތިބެގެން، ހަމަ ގާނޫނީ އުސޫލުގެ ތެރެއިން، ކަނޑައެޅިފައި އޮންނަ މިންގަނޑުތަކެއްގެ ތެރެއިން މަސައްކަތް ކުރާ ގޮތަށް ބަދަލުކުރުން، ހަފްތާއަކު 30 ގަޑިއިރު، ނޫނީ ކަނޑައެޅޭ ވަކި ވަގުތަކަށް، ވަގުތު ހަމަ ކުރަން އޮފީހަށް އައުން އޭގެތެރޭގައި ހިމެނޭ ގޮތަށް،" ރައީސް ވިދާޅުވި އެވެ.

ރައީސް ވިދާޅުވީ ޑިޖިޓަލައިޒް ކުރުމުގެ އެންމެ މައިގަނޑު އެއް މަގުސަދަކީ މި ގައުމުން ކޮރަޕްޝަންގެ ވަބާ ނައްތާލުން ކަމަށެވެ.

އަދި ވިދާޅުވީ އެންމެން އެއްޖޯޝެއްގައި ރާއްޖެއަކީ ތަރައްގީވެފައިވާ ގައުމަކަށް ހެދުމަށް ކުރާ މަސައްކަތުގައި ކޮރަޕްޝަން ނައްތާލަން ޖެހޭ ކަމަށެވެ. އޭގެ އިތުރުން އެކަން ހާސިލު ކުރުމަށް ގައުމުގައި އޮތް ހިންގުމުގެ ނިޒާމް ޑިޖިޓަލައިޒް ކުރުމުގެ މުހިންމުކަން އެ މަނިކުފާނު ފާހަގަ ކުރެއްވި އެވެ.

ޑިޖިޓަލައިޒޭޝަންގެ ތެރެއިން މިހާރު ބޭނުން ކުރާ އައިޑީކާޑަކީ، ސްމާޓް، ޑިޖިޓަލް، އަދި ހުރިހާ ހިދުމަތެއް އެ ކާޑުން ހޯދޭނެ ގޮތް ހިމެނޭ ކާޑަކަށް ހެދުމަށް މަސައްކަތް ކުރައްވާނެކަން އެ މަނިކުފާނު ފާހަގަ ކުރެއްވި އެވެ. ހަމައެއާ އެކު، ސައިބާ ސެކިއުރިޓީ އިންތިހާއަށް ރަނގަޅުކޮށް، ހިދުމަތުގެ ނިޒާމް ވަރުގަދަ ކުރެވޭނެ ކަމުގައި ވެސް އެ މަނިކުފާނު ވިދާޅުވި އެވެ.

ރައީސްގެ ވާހަކަފުޅުގައި ވަށާޖެހޭ، މާނަ ހުރި، ދެމެހެއްޓިނިވި ތަރައްގީ، ހާސިލު ކުރުމަށް މި ސަރުކާރުން ކުރާ މަސައްކަތް ތަކަށް ވެސް އަލިއަޅުއްވާލެއްވި އެވެ. އަދި އުމްރާނީ ތަރައްގީގެ އިތުރުން މުޖުތަމައުގެ ކަންކަން ރަނގަޅުކޮށް "ގުޑް ގަވާނަންސް"ގެ ސިޔާސަތުތައް ތަންފީޒު ކުރުމަށް މަސައްކަތްތައް ކުރަމުންދާކަން އެ މަނިކުފާނު ހާމަ ކުރެއްވި އެވެ.

ހަމައެއާއެކު ޑިޖިޓަލައިޒޭޝަންގެ ކަންކަން ފުރިހަމަ ވުމުން މިހާރުގެ ވޯކް ފޯސްގެ ތިން ބައިކުޅަ އެއްބައި ގޭގައި ތިބެގެން މަސައްކަތް ކުރާ ގޮތަށް، 2028 ވަނަ އަހަރާ ހަމައަށް ދާއިރު ބަދަލު ކުރުމަށް އުންމީދު ކުރައްވާ ކަމަށް ރައީސް މުއިއްޒު ވިދާޅުވި އެވެ.