މާލޭ ގްރޫޕް އޮފް ހޮސްޕިޓަލްސް ދަށަށް ތެލެސީމިއާ ސެންޓަރު ބަދަލު ކުރަނީ

މާލޭ ގްރޫޕް އޮފް ހޮސްޕިޓަލްސް ދަށަށް، މޯލްޑިވިއަން ބްލަޑް ސާވިސަސް (އެމްބީއެސް) ވަރަށް އަވަހަށް ބަދަލު ކުރަން ނިންމަވާފައިވާ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

"ރައްޔިތުންނާ އެކު" ސިލްސިލާ ޕޮޑްކާސްޓްގެ 5 ވަނަ އެޕިސޯޑްގައި މިއަދު ވާހަކަފުޅު ދައްކަވަމުން އެންމެ ގިނަވެގެން ކުރިއަށްއޮތް ދެ ހަފުތާ ތެރޭގައި، އެމްބީއެސް ގެ ހިންގުމާއި މާލޭ ގްރޫޕް އޮފް ހޮސްޕިޓަލްސްގެ ފަރާތުން ހަވާލުވާނެ ކަމަށް ރައީސް ވިދާޅުވި އެވެ. އޭގެ އިތުރުން މި ބަދަލުގެ ސަބަބުން ގިނަ ފައިދާ ތަކެއް ކުރާނެ ކަމުގައި ވެސް ވިދާޅުވި އެވެ.

އެ ގޮތުން މި ބަދަލުގެ ސަބަބުން ސްޕެޝަލިސްޓް ޑޮކްޓަރުންގެ އެހީގައި ތެލެސީމިއާ ކުދިންގެ ހުރި އެކިއެކި މައްސަލަ ތަކާއި ދަތި ތަކަށް، ހައްލު ލިބިގެން އަންނާނެކަން ރައީސް ފާހަގަ ކުރެއްވި އެވެ.

އަދި މި ބަދަލާއެކު، ރާއްޖޭގެ އަތޮޅު ތަކުގައި ދެވޭ ހިދުމަތްތައް ވެސް ހިނގަމުންދާނީ އެ ތަނުގެ ދަށުން ކަމަށާއި ތެލެސީމިއާ ސެންޓަރު ހުޅުމާލޭ އޮރެންޖު ހިޔާއަށް ބަދަލު ވެގެންދިއުމާ އެކު ހުޅުމާލޭގައި ހުރި، މާލޭ ހޮސްޕިޓަލްސް ގްރޫޕުގެ ހޮސްޕިޓަލުން އެ ތަނުގެ ހިންގުމުގައި ވަރަށް ބޮޑު ދައުރެއް އަދާ ކުރާނެ ކަމުގައި އެ މަނިކުފާނު ވިދާޅުވި އެވެ.

ޕޮޑްކާސްޓުގެ މަސައްކަތްތައް ފަށައިގަތް ދުވަސްވަރު، ތެލެސީމިއާ ސެންޓަރަށް ވަޑައިގެން، އެ ތަނުގެ ހާލަތު ބައްލަވައިލެއްވި ހިސާބުން ފެށިގެން ގިނަ މަސައްކަތް ތަކެއް މިހާތަނަށް ކުރެވި، ބޮޑެތި ކުރިއެރުން ތަކެއް ހޯދިފައިވާ ކަމަށް ރައީސް ވިދާޅުވި އެވެ.

އޭގެ ތެރޭގައި މާލޭގައި ހިންގަމުންދިޔަ ތެލެސީމިއާ ސެންޓަރު، ހުޅުމާލޭގެ އޮރެންޖު ހިޔާ އިމާރާތަށް ބަދަލު ކުރުމަށް ހަމަޖެހިފައިވާކަން އެ މަނިކުފާނު ފާހަގަ ކުރެއްވި އެވެ.

ރައީސްގެ ވާހަކަފުޅުގައި، އޮރެންޖު ހިޔާ އިމާރާތުގައި ޖާގަ ތަނަވަސް ވުމުގެ އިތުރުން ވަސީލަތް ވެސް ކުރިއަށް އޮތް ތަނުގައި އިތުރު ވަމުން ދާނެ ކަމަށާއި ވަސީލަތް އިތުރު ކުރުމުގައި ބަޖެޓު ހަމަޖެއްސުމަށް، ފިނޭންސް މިނިސްޓްރީއަށް ދެއްވަންޖެހޭ އެންމެހައި ހުއްދަތައް މިހާރު ވާނީ ދެއްވާފައި ކަމުގައި ވެސް ވިދާޅުވި އެވެ. މީގެ އިތުރުން މި ސެންޓަރަށް ބޭނުންވާ މުވައްޒަފުން ހޯދުމުގެ މަސައްކަތް ވެސް ކުރިއަށްދާ ކަމުގައި ވިދާޅުވި އެވެ.