ޓެރެރިޒަމާ ހަރުކަށި ފިކުރުގެ ވަބާއަކީ ވަކި ދީނަކާ ގުޅުންހުރި ކަމެއް ނޫން: ޝަހީމް

ޓެރެރިޒަމާ ހަރުކަށި ފިކުރުގެ ވަބާއަކީ ވަކި ދީނަކާ ގުޅުންހުރި ކަމެއް ނޫން ކަމަށާއި މި ފިކުރީ ބަލިމަޑު ކަމަށް އޮތް ހަގީގީ ހައްލަކީ އިތުބާރު ހުރި މަސްދަރު ތަކުން އިލްމު ހޯދުން ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެ އެވެ.

އެ މަނިކުފާނު މިހެން ވިދާޅުވީ އިސްލާމިކް މިލިޓަރީ ކައުންޓާ ޓެރެރިޒަމް ކޯލިޝަނާއި ރާއްޖޭގެ ނޭޝަނަލް ކައުންޓާ ޓެރެރިޒަމް، ގުޅިގެން އިމާމުންނާއި އިލްމުވެރިންނަށް ބާއްވާ ކެޕޭސީޓީ އިތުރު ކުރުމުގެ ފޯރަމް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ޝަހީމް ވިދާޅުވީ އިސްލާމީ ތާރީހުގައި އިލްމުވެރީންނާއި އިމާމުންނަކީ މުޖުތަމައުގެ އެންމެ އިސް ދައުރެއް އަދާ ކުރާ ފަރާތްތައް ކަމަށާއި އަދި ދީނީ ގޮތުންނާއި އިޖުތިމާއީ ގޮތުން އާއްމު ފަރުދުން ހޭލުންތެރި ކުރުމުގައި ވެސް އެންމެ އިސް ދައުރެއް އަދާ ކުރަމުން އަންނަނީ އެ ފަރާތް ތަކުން ކަމަށެވެ.

މިނިސްޓަރު ޝަހީމްގެ ވާހަކަފުޅުގައި ވަނީ އިސްލާމީ އުއްމަތް ޓެރެރިޒަމާ ހަރުކަށި ފިކުރު ފަދަ ފިކުރު ތަކުން ސަލާމަތް ކުރުމަށް ސައުދީ އަރަބިއްޔާ އިސްވެ، އޮވެ ކުރާ މުހިއްމު މަސައްކަތް ފާހަގަ ކުރައްވައި އެ ގައުމުގެ ރަސްގެފާނު ސަލްމާން ބިން އަބްދުލް އަޒީޒްއަށާއި، ޕްރިންސް މުޙައްމަދު ބިން ސަލްމާނަށް ޝުކުރު އަދާ ކުރައްވާފަ އެވެ.

މީގެ އިތުރުން ރައީސުލްޖުމުހޫރިއްޔާ ޑރ. މުޙައްމަދު މުއިއްޒުގެ ސަރުކާރުން އިސް ނަގައިގެން މި ފަދަ ފިކުރު ތަކާއި ދެކޮޅަށް ގިނަ މަސައްކަތް ތަކެއް ކުރަމުން އަންނަ ކަމަށާއި ރާއްޖެ އާއި ސައުދީ ގުޅިގެން މި ކަމުގައި މުހިއްމު މަސައްކަތް ތަކެއް ކުރެވޭނެކަން ވެސް އެމަނިކުފާނުގެ ވާހަފުޅުގައި ވަނީ ފާހަގަ ކުރައްވާފަ އެވެ.