ތަރައްގީގައި އިސްކަން ދޭނީ އިސްލާމްދީނުގެ ހަމަތަކާއެއްގޮތަށް ކުރިއަށް ގެންދަން: ރައީސް

ގައުމު ތަރައްގީގެ ކަންކަން ކުރިއަށްގެންދާއިރު، އެންމެ އިސްކަމެއް ދެއްވާނީ އިސްލާމްދީނުގެ ހަމަތަކާ އެއްގޮތަށް ކަންކަން ކުރިއަށްގެންދިއުމަށް ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލު ކުރެއްވުމުގައި ވާހަކަފުޅު ދައްކަވަމުން އެ މަނިކުފާނު ވިދާޅުވީ ސަރުކާރުގެ ހާރިޖީ ސިޔާސަތުގެ އަސާސަކަށް ވާނީ، ހުރިހާ ހާލަތެއްގައި ވެސް ދިވެހީންގެ މަސްލަހަތު އިސްކޮށް، ދިވެހީންގެ މިނިވަން ކަމާއި، ސިޔާދަތީ ބާރު ހިމާޔަތްކޮށް ދެމެހެއްޓުމަށް ކަމަށެވެ.

ރައީސް ވިދާޅުވީ ސަރުކާރުގެ ހުރިހާވެސް އަމާޒަކީ، ނަތީޖާ ނެރުންކަމަށެވެ. އަދި ނަތީޖާއަށް ދިއުމުގައި ހުރަސްތަކެއް ދިމާވާނަމަ، އެކަންމުން އެންމެ ގެއްލުން ކުޑަ ހައްލެއް، އަވަހަށް ހޯދައިގެން އެ އަމާޒަށް ވާސިލުވުމަށް މަސައްކަތް ކުރައްވާ ކަމުގައި އެ މަނިކުފާނު ވިދާޅުވި އެވެ.

ސަރުކާރުން ރައްޔިތުންނަށް ދެމުންދާ ހިދުމަތްތަކާ ބެހޭގޮތުން އެ މަނިކުފާނު ވިދާޅުވީ އައިޖީއެމްއެޗުގެ ތެރޭގައި އެކިދާއިރާ ތަކުން ސްޕެޝަލައިޒްޑް ވެފައި ތިއްބެވި ޑޮކްޓަރުން، ބަލިމީހުންނަށް ހިދުމަތް ދެވޭގޮތަށް، ބެލޭ ވަގުތު އިތުރުކުރެވޭ އޯޕީޑީ ކްލިނިކްތަކެއް ހަދަން މިހާރު ނިންމާފައިވާކަމަށާއި އެކަން ކުރުމަށް ޓަކައި މަސައްކަތްތަކެއް ކުރެވޭ ކަމަށެވެ.

ރައީސްގެ ވާހަކަފުޅުގައި، ސިނަމާލެ މާލެހިޔާ ސަރަހައްދުގައި ފުލެޓު އެޅުމަކީ ސަރުކާރުގެ ވަރަށް ބޮޑު ވައުދެއް ކަމުގައި ވިދާޅުވި އެވެ. އަދި އެ މަނިކުފާނު މާލޭ ސިޓީގެ މޭޔަރަކަށް ހުންނެވިއިރު މި މަޝްރޫއުގައި ސޮއި ކުރައްވާފައިވާނެ ކަމުގައި ވިދާޅުވި އެވެ.

 މި މަޝްރޫއު ކުރިއަށްގެންދާނީ ސިޓީ ކައުންސިލްގެ ތެރެއިން ކަމަށާއި މި މަޝްރޫއުގެ ތެރެއިން މިހާރު ހުރި ސިނަމާލެ އަދި މާލޭހިޔާ ފުލެޓްތަކުގައި ދިރިއުޅޭ މީހުން އަމިއްލަކޮށްފައިހުރި ތަންތަން އަލަށް އަޅާ އިމާރާތް ތަކަށް ބަދަލު ކުރެވި، ބައު އިމާރާތް ތަޅާލުމަށް ފުރުސަތު ލިބިގެންދާނެ ކަމުގައި ވިދާޅުވި އެވެ.