ބަޔޯމެޓްރިކްސް އަޕްޑޭޓު ނުކުރާ ފަރާތްތައް، ސިސްޓަމުން ބްލޮކްކުރަނީ

ބަޔޯމެޓްރިކް ޑާޓާ އަޕްޑޭޓު ނުކުރާ ބިދޭސީ މަސައްކަތްތެރީން ގެންގުޅޭ ހުރިހާ ފަރާތްތައް، އަންނަ އާދިއްތަ ދުވަހުން ފަށައިން ސިސްޓަމްގެ ތެރެއިން ބްލޮކްކުރާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ބައޯމެޓްރިކްސް އަޕްޑޭޓު ކޮށްފައި ނުވާ ބިދޭސީންގެ ހާލަތު ނުވަތަ ވޯކު ޕާމިޓް ސްޓޭޓަސް މިދިޔަ މަހުގެ 30ވަނަ ދުވަހުގެ ކުރިން ހިއްސާ ކުރުމަށް މިނިސްޓްރީން ވަނީ މީގެ ކުރިން އެދިފަ އެވެ. އަދި މި މުއްދަތުގައި އެކަށީގެންވާ ސަބަބެއް ނެތި ބައޯމެޓްރިކްސް އަޕްޑޭޓުނުވާ ވަޒީފާ ދޭ ފަރާތްތައް އެކްސްޕެޓް ސިސްޓަމުން ސަސްޕެންޑްކޮށް، ހިދުމަތް މެދުކަނޑާލާނެ ކަމަށް މިނިސްޓްރީން ވަނީ ހާމަ ކޮށްފަ އެވެ.

މަސައްކަތްތެރީންގެ ދުވަހާ ގުޅުވައިގެން ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން މިނިސްޓަރު ވިދާޅުވީ ބިދޭސީންނާ ގުޅޭ ގާނޫނުތައް ހުރީ އެތައް އަހަރެއްވީ އިރުވެސް ތަންފީޒު ނުވެ ކަމަށާއި ނަމަވެސް ގާނޫނުތައް ތަންފީޒު ކުރުމުގެ މަސައްކަތް މިހާރު ފަށާފައިވާ ކަމަށެވެ.

ގާނޫނުތައް ތަންފީޒު ކުރަމުންދާ ވަރަކަށް ބިދޭސީންގެ ހައްގުތައް ކަށަވަރުވެ، ރާއްޖޭގައި އޮތް އިޖުތިމާއީ ބޮޑު މައްސަލައަށް ދާއިމީ ހައްލެއް ލިބިގެންދާނެ ކަމަށް ވެސް އިހުސާން ވިދާޅުވި އެވެ.

އިހުސާން ވިދާޅުވީ މި މަސައްކަތުގެ ދެ ވަނަ ފިޔަވަހީގެ މަސައްކަތްތައް ނިމުމަކާ ގާތަށް ގޮސްފައިވާ ކަމަށާއި އަދި 3 ވަނަ ފިޔަވަހީގައި މައުލޫމާތުތައް ހޯދާފައިވާ ބިދޭސީން ގަވާއިދުގެ ތެރެއަށް ފަސޭހަކަމާއެކީ ގެނެވޭނެ މަގުތައް ފަހިކޮށްދެއްވާނެ ކަމަށެވެ.

އެގޮތުން މަސައްކަތްތެރީންނަށް ވޯކް ޕާމިޓް ހޯދުމަށާއި ސައިޓް ރަޖިސްޓްރީ ކުރުމަށް މިހާރު ކުރިމަތިވެފައިވާ ދަތިތައް ވަރަށް ބޮޑަށް ފަސޭހަ ކުރާނެ ކަމަށް ވެސް މިނިސްޓަރު ވިދާޅުވި އެވެ.

އަދި ބިދޭސީންނާ މެދު އިހުމާލުވާ ފަރާތްތައް 50،000 ރުފިޔާއިން ޖޫރިމަނާ ކުރުމުގެ މަސައްކަތް ފަށްޓާނެކަން ފާހަގަ ކުރައްވާ އެ މަނިކުފާނު ވަނީ މިހާތަނަށް ބަޔޯމެޓްރިކްސް އަޕްޑޭޓު ނުކުރާ ބިދޭސީ މަސައްކަތްތެރީން ގެންގުޅޭ ހުރިހާ ފަރާތްތައް އަންނަ އާދިއްތަ ދުވަހުން ފަށައިގެން ސިސްޓަމްގެ ތެރެއިން ބްލޮކް ކުރަން ފަށާނެ ކަމަށް ވިދާޅުވެފަ އެވެ.

މި ސަރުކާރުގެ އަމާޒަކީ 2027 ވަނަ އަހަރުގެ އޭޕްރިލް މަހުގެ ނިޔަލަށް ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ގެނައުމެވެ. އެގޮތުން ގަވާއިދާ ހިލާފަށް ރާއްޖެގައި އުޅެމުންދިޔަ، 6700 އަށް ވުރެ، ގިނަ ބިދޭސީން ޑީޕޯޓު ކޮށްލާފައިވާ ކަމަށް މިނިސްޓަރު އިހުސާން ވަނީ ވިދާޅުވެފަ އެވެ.