ރާއްޖެ މިއަދު މި ދެކޭ ހިސާބަށް ގެނެސްދިނީ މަސައްކަތްތެރީ: ރައީސް

ރާއްޖެ މިއަދު މި ދެކޭ ހިސާބަށް ގެނެސްދިނީ މަސައްކަތްތެރީކަމަށާއި އަދި، މާދަމާ ގާއުމު ދާން އުންމީދު ކުރާ އުސްމިން ތަކަށް ވާސިލު ކޮށްދޭނީވެސް މަސައްކަތްތެރީން ކަމުގައި ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެ މަނިކުފާނު މިހެން ވިދާޅުވީ ބައިނަލްއަގުވާމީ މަސައްކަތްތެރީންގެ ދުވަހުގެ މުނާސަބަތުގައި ފޮނުއްވި ހިތޯބުގަ އެވެ.

ރައީސްގެ ހިތޯބުގައި ވަނީ ކޮންމެ ކުއްޖަކީވެސް މަސައްކަތްތަކަށް އަހުލުވެރި ހީވާގި ކުއްޖެއްގެ ގޮތުގައި ބޮޑުކުރަން ހާއްސަ ސަމާލުކަމެއް ދިނުމަށް ދިވެހި އެންމެހާ ބެލެނިވެރީންނަށް އިލްތިމާސްކުރައްވާފަ އެވެ.

ދިވެހީން އެދޭ ތަމައްދުން ހާސިލް ކުރެވޭނީ އެންމެ ދިވެއްސަކުވެސް، މަސައްކަތެއް ނުކޮށް ބާކީ ވެގެންދާން ދޫކޮށް ނުލަން މުޅި މުޖްތަމައު ގުޅިގެން ގައުމީ މަސައްކަތް ތަކެއް ފެށިގެންކަމުގައި އެ މަނިކުފާނު ފާހަގަކުރައްވާފައިވެ އެވެ. އަދި ކޮންމެ ދުވަހަކުވެސް މި ގައުމު ކުރިއަށް ފިޔަވަޅު ތަކެއް އަޅަނީ މަސައްކަތްތެރީންގެ ސަބަބުން ކަމުގައި ފާހަގަ ކުރައްވައި މަސައްކަތްތެރީންގެ އަޑު އެހުމުގައި، އަދި މަސައްކަތްތެރީންނަށް މަގުތައް ފަހިކޮށްދީ، ލިބޭ އާމުދަނީ އިތުރު ކުރެވޭނެ ގޮތްތައް ހޯދައި ދިނުމުގައި ސަރުކާރު ދެމި އޮންނާނެ ކަމުގައިވެސް ވިދާޅުވެފައިވެ އެވެ.

ރައީސް ވިދާޅުވީ ރާއްޖޭގައި ކުރެވޭ އިގުތިސާދީ މަސައްކަތްތައް އިތުރު ކުރުމަށާއި، ވަޒީފާގެ ފުރުސަތުތައް ގިނަ ކުރުމަށް ސަރުކާރުން ވަރަށް ބޮޑަށް އިސްކަންދޭ ކަމަށެވެ. އަދި ގައުމަށް ފައިދާ ހުރި މަސައްކަތްތެރި އަތްތައް ގިނަ ކުރުމަށްޓަކައި، މަސައްކަތުގެ އަހުލާގާއި، ހުނަރު ދަސްކޮށްދިނުން ތައުލީމީ މަންހަޖުގައި އިތުރު ކުރަން ޖެހޭ ކަމުގައި އެ މަނިކުފާނު ވިދާޅުވެފައިވެ އެވެ.

ހަމައެއާއެކު ސަލާމާއި ސަލަވާތްލެއްވި މާތް ނަބިއްޔާގެ ސުންނަތުގައިވާ ގޮތަށް ކޮންމެ މުސްލިމަކީ ވެސް ކެރި ކުޅަދާނަވީ މިންވަރަކުން، މަސައްކަތްތެރި އަކަށް ވުމަށް އެ މަނިކުފާނު ބާރުއަޅުއްވާފައިވެ އެވެ.

އެމަނިކުފާނުގެ ހިތޯބު ނިންމަވާލަވަމުން "ދިވެހި އުންމަތުގެ ހަކަތައަކީ، ބުންވަރަކީ، އެއްވެސް ޝައްކެއްނެތް ގޮތުގައި މި ގައުމުގެ ހީވާގި ހިދުމަތްތެރީން" ކަމުގައި ބަޔާން ކުރައްވާފައިވެ އެވެ.