ހިޔާވަހި ސްކީމަށް ކުރިމަތިލުމުގެ މުއްދަތު އިތުރުކޮށްފި

ގެދޮރުއެޅުމަށް ދަތިވެފައިވާ މީހުންނާށް ހާއްސަކޮށްގެން ކުޑަ އިންޓަރެސްޓް ރޭޓެއްގައި ސަރުކާރުން ތައާރަފްކުރި ހިޔާވަހި ފައިނޭންސިން ޕްރޮގްރާމްގެ ސްކީމަށް ކުރިމަތިލުމުގެ މުއްދަތު އިތުރުކޮށްފި އެވެ.

މިދިޔަ ނޮވެމްބަރު މަހުގެ އަށް ވަނަ ދުވަހު، އެ ސްކީމަށް ކުރިމަތިލުމުގެ ފުރުސަތު ހުޅުވާލިއިރު، އެ މުއްދަތު މިމަހުގެ އަށް ވަނަ ދުވަހަށް ވަނީ ހަމަވެފަ އެވެ.

ހައުސިން މިނިސްޓަރު ޑރ. އަބްދުﷲ މުއްތަލިބު މިރޭ ކުރެއްވި އެކްސްގައި ޕޯސްޓެއްގައި ވިދާޅުވީ މި ޕްރޮގްރާމްގެ ތިން ސްކީމަށް އެދި ހުށަހެޅުމުގައި ކުރެހުމާއި ބީއޯކިއު، ހުށަހަޅަން ޖެހޭތީ އެ ކަމަކީ ވަގުތު ނަގާ ކަމަށްވާތީ މި ޕްރޮގްރާމްގެ މުއްދަތު އިތުރުކޮށް ދިނުމަށް ވަރަށް ގިނަ ފަރާތް ތަކުން އެދެމުން އަންނަ ކަމަށެވެ.

އެހެން ކަމުން މި ޕްރޮގްރާމްގެ ސްކީމް ތަކަށް އެދި ހުށަހެޅުމުގެ މުއްދަތު މޭ މަހުގެ 31 ގެ ނިޔަލަށް އިތުރު ކުރުމަށް ނިންމާފައިވާ ކަމަށް މިނިސްޓަރު ވިދާޅުވި އެވެ.

ހިޔާވަހި ފައިނޭންސިން ޕްރޮގްރާމުގައި ހިމެނެނީ މުޅިއެކު ތިން ސްކީމެކެވެ. އެއީ ރަށްވެހި ފައިނޭންސިން ސްކީމް އާއި ސަހަރު ފައިނޭންސިން ސްކީމް، އަދި ފަހިމާލެ ފައިނޭންސިން ސްކީމެވެ.

މީގެ ތެރެއިން އަތޮޅު ތަކުން ހުށަހަޅާ ފަރާތް ތަކަށް ރަށްވެހި ފައިނޭންސިން ސްކީމުގެ ދަށުން އެއް މިލިއަން ރުފިޔާ، އާބަން ސެންޓަރު ތަކުން ސަހަރު ފައިނޭންސިން ސްކީމަށް އެދި ހުށަހަޅާ ފަރާތް ތަކަށް ތިން މިލިއަން ރުފިޔާގެ އިތުރުން، މާލެ ސަރަހައްދަށް ހާއްސަ ފަހިމާލެ ފައިނޭންސިން ސްކީމަށް ހަ މިލިއަން ރުފިޔާއާ ހަމައަށް ފައިނޭންސް ލިބޭނެ އެވެ.

މާލެ ސަރަހައްދަށް ހުޅުވައިލި ފުރުސަތުގައި، ގޭގެ ބެހެނިވެރީންނާއެކު އެކުވެގެން ހަ މިލިޔަން ރުފިޔާއިން ފަށައިގެން 10 މިލިޔަން ރުފިޔާއާ ހަމައަށް ފައިނޭންސަށް އެދެވޭނެ އެވެ.