ސަންވޭ ގުރޫޕުގެ ޗެއާމަން ރައީސްގެ އަރިހަށް ޒިޔާރަތް ކުރައްވައިފި

ސަންވޭ ގުރޫޕުގެ ފައުންޑާ އަދި ޗެއާމަން ޑރ. ޖެފްރީ ޗެއާ އޭއޯ، ރައީސް ޑރ. މުޙައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައިފި އެވެ.

މި ބައްދަލު ވުން އޮތީ ރައީސް މެލޭޝިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.

މި ބައްދަލު ކުރެއްވުމުގައި ރާއްޖެއާއި ސަންވޭ ގްރޫޕާ ދެމެދު ގުޅުން ބަދަހި ކުރެވިދާނެ ދާއިރާތައް ދެނެގަތުމާ ބެހޭ ގޮތުން މަޝްވަރާ ކުރެއްވިއެ ވެ.

އެ ގޮތުން ރައީސް ވަނީ ވަޒީފާ އަދާ ކުރަމުން އިތުރު ތަމުރީނު ހޯދުމުގެ މުހިންމު ކަމުގެ މައްޗަށް އަލިއަޅުއްވާލައްވައި ރާއްޖޭގެ ގައުމީ ޔުނިވާސިޓީއާއި ގުޅިގެން މި ފަދަ ތަމްރީނުތައް ކުރިއަށް ގެންދިއުމުގެ ފުރުސަތު އޮތްކަން ފާހަގަ ކުރައްވާފަ އެވެ. އަދި ފަތުރުވެރި ކަމާއި ތައުލީމާއި ސިއްހީ ދާއިރާގައި ހުރި އެކިއެކި ފުރުސަތު ތަކުގެ މައްޗަށް ވެސް ރައީސްގެ ވާހަކަފުޅުގައި އަލިއަޅުއްވާލެއްވި އެވެ.

މި ބައްދަލު ކުރެއްވުމުގައި، ޑރ. ޖެފްރީ ޗެއާ އޭއޯ ވަނީ ސަންވޭ ގްރޫޕްގެ އޮޕަރޭޝަން ތަކާއި ތަޖުރިބާ ހުރި ދާއިރާ ތަކުގެ ތަފުސީލު ރައީސް އާ ހިއްސާ ކުރައްވާފަ އެވެ.

އޭގެ އިތުރުން ސަންވޭ ގުރޫޕުގެ ފަރާތުން ވަނީ ރާއްޖޭގައި އިންވެސްޓު ކުރުމުގެ ފުރުސަތުތައް ހުރި ގޮތާއި، ފޮރިން އިންވެސްޓަރުންނަށް ހުޅުވިފައިވާ ހާއްސަ ފުރުސަތު ތަކާއި، ޓެކްސްގެ ސިޔާސަތާއި، ވިސާ އާބެހޭ މައުލޫމާތާއި، ފައިސާގެ މުއާމަލާތް ތަކާއި އަދިވެސް އެހެނިހެން މި ދާއިރާއާއި ގުޅުންހުރި ކަންކަމުގެ މައުލޫމާތު ސާފު ކުރައްވާފަ އެވެ.

މި ކަންކަމުގެ އިތުރުން ވެސް، ރާއްޖެއަށް ޒިޔާރަތްކޮށް، ރާއްޖޭގައި ހުރި އިންވެސްޓްމަންޓު ފުރުސަތު ތަކާބެހޭ އިތުރު މައުލޫމާތު ހޯއްދެވުމުގެ ޝައުގުވެރިކަން އެ ބޭފުޅުން ފާޅު ކުރެއްވި އެވެ.

މި ބައްދަލު ކުރެއްވުން ނިންމަވާލެއްވީ ފާގަތި ކުރިމަގަކަށް އުއްމީދު އައު ކުރައްވަމުންނެވެ.