ޝަރީއަތް ނިމެންދެން ޝަމްއާން ބަންދު ކުރަން ކުރި އަމުރު ހައިކޯޓުން ދަމަހައްޓައިފި

އިމިގްރޭޝަންގެ ކޮންޓްރޯލާ ޖެނެރެލްގެ މަގާމުގައި ކުރިން ހުންނެވި ޝަމްއާން ވަހީދު، ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން ކުރި އަމުރަށް ހައި ކޯޓުން ވެސް ތާއީދު ކޮށްފި އެވެ.

ޝަމްއާންގެ ބަންދާމެދު ގޮތެއް ނިންމަން ކޯޓަށް ހާޒިރު ކުރުމުން 15 ދުވަހަށް ބަންދު ކުރަން ނިންމުމަށްފަހު، އެ ނިންމުން ބަދަލުކޮށް، ޝަރީއަތް ނިމެންދެން އޭނާ ބަންދުގައި ބަހައްޓަން ކްރިމިނަލް ކޯޓުން އަމުރު ކުރި އެވެ.

އެހެންވެ، ޝަމްއާންގެ ފަރާތުން އެ މައްސަލަ ހައި ކޯޓުގައި އިސްތިއުނާފު ކުރުމުން ތިން ފަނޑިޔާރުންގެ އިއްތިފާގުން ވަނީ ޝަރީއަތް ނިމެންދެން ބަންދު ކުރަން ނިންމި ނިންމުން ރަނގަޅު ކަމަށް ކަނޑައަޅައި އެ ނިންމުމަށް ތާއީދު ކޮށްފަ އެވެ.

މިދިޔަ މަހުގެ 21 ވަނަ ދުވަހުގެ ރޭ ޝަމްއާން ހައްޔަރު ކުރީ ބިދޭސީންގެ އަތުން ނާޖާއިޒު މަންފާ ހޯދި ކަމުގެ ތުހުމަތުގަ އެވެ.

ފުލުހުން ބުނެފައި ވަނީ އިމިގްރޭޝަންގެ ޓާސްކް ފޯސް އަދި ރިސްކް މެނޭޖުމެންޓް ސެކްޝަން ފިޔަވައި، އެހެން ސެކްޝަން ތަކެއްގައި މަސައްކަތް ކުރާ މުވައްޒަފުން ތަކެއް، އެ މުވައްޒަފުންގެ މަގާމުގެ ނުފޫޒު ނަހަމަ ގޮތުގައި ބޭނުން ކޮށްގެން ބިދޭސީން ދިރިއުޅެމުންދިޔަ ގެއެއް ބަލައި ފާސްކޮށް، އޭގެ އެއް ދުވަސް ފަހުން، ޝައްމާންގެ އަމުރަށް އެ ގެއިން ފެނުނު 530،000 ރުފިޔާއާއެކު، ޑިޓެންޝަނަށް ގެންދެވުނު ބިދޭސީއަކު، ދަންވަރުގެ ވަގުތެއްގައި ބަންދުން ދޫކޮށްލާފައިވާކަން  ތަހުގީގަށް އެނގިފައިވާ ކަމަށެވެ.

މި މައްސަލައިގައި ކޯޓު އަމުރެއްގެ ދަށުން ޝައްމާން ދިރިއުޅޭ ގެ ބަލައި ފާސްކޮށް، ގިނަ އަދަދެއްގެ ފައިސާއާއެކު އިލެކްޓްރޮނިކް ސާމާނު ތަކެއް ފުލުހުންގެ ބެލުމުގެ ދަށަށް ގެންގޮސްފައިވެ އެވެ.