ރައީސަށް މެލޭޝިއާ ސަރުކާރުން ރަސްމީގޮތުން މަރުހަބާ ދަންނަވައިފި

ރައީސް ޑރ. މުޙައްމަދު މުއިއްޒަށް މެލޭޝިޔާގެ ސަރުކާރުން ރަސްމީކޮށް މަރުހަބާ ދެންނެވުން -- ފޮޓޯ/ ރައީސް އޮފީސް

ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއަށް މެލޭޝިއާ ސަރުކާރުން ރަސްމީ ގޮތުން މަރުހަބާ ދަންނަވައިފި އެވެ. މަރުހަބާ ދެންނެވުމުގެ ރަސްމިއްޔާތު އޮތީ، މިއަދު ހެނދުން އެ ގައުމުގެ ޕުޓުރާޖާޔާގަ އެވެ.

ރައީސް ޕުޓުރާޖާޔާއަށް ވަޑައިގަތުމުން މަރުހަބާ ވިދާޅުވީ، މެލޭޝިއާގެ ބޮޑުވަޒީރު އަންވަރު އިބްރާހީމެވެ.

މި ރަސްމިއްޔާތުގައި ރައީސް ވަނީ އެ މަނިކުފާނުގެ ޝަރަފުގައި އޮތް ޝަރަފްގެ ގާޑް، އިންސްޕެކްޓް ކޮށްދެއްވާފަ އެވެ. އަދި އެއަށްފަހު މެލޭޝިއާގެ އަސްކަރީން ދެ ގައުމުގެ ގައުމީ ސަލާމް ކުޅެފައިވެ އެވެ.

މި ރަސްމިއްޔާތުގައި، ރައީސަށް މެލޭޝިއާގެ އިއްޒަތްތެރިން މަރުހަބާ ވިދާޅުވެ ތައާރަފުވެވަޑައިގަތުމަށްފަހު، ދިވެހި ވަފުދުގެ ބޭފުޅުން ބޮޑުވަޒީރު އަންވަރު އިބްރާހީމަށް ތައާރަފުކޮށްދެއްވި އެވެ. އަދި ދެ ގައުމުގެ ލީޑަރުން އެކުގައި މެލޭޝިއާގެ، ޕުޓުރާ މިސްކިތުގެ ކުރިމަތީގައި ހަނދާނީ ފޮޓޯފުޅެއް ނެންގެވުމަށްފަހު، މެހުމާނުން ސޮއިކުރައްވާ ފޮތުގައި ރައީސް މުއިއްޒު ސޮއިކުރެއްވި އެވެ.

މިދަތުރުފުޅުގައި، އެ މަނިކުފާނުގެ އަރިހުގައި ވަޒީރުންގެ މަޖިލީހުގެ މެންބަރުންނާއި ސަރުކާރުގެ އިސްވެރިންގެ ވަފުދެއް ބައިވެރިވެވަޑައިގަންނަވަ އެވެ.

ރައީސް ޑރ މުޢިއްޒު މެލޭޝިޔާ