ކީ ސްޓޭޖު 3 ނިންމާ ދަރިވަރުންނަށް ފުރަތަމަ ފަހަރަށް ނާލޯ އެސެސްމެންޓް ބާއްވައިފި

ކީ ސްޓޭޖު 3 ގެ ދަރިވަރުންނަށް އަމާޒުކޮށްގެން މުޅިން އަލަށް ބޭއްވޭ ނޭޝަނަލް އެސެސްމަންޓް އޮފް ލާރނިން އައުޓްކަމްސް (ނާލޯ) މިއަދު ފަށައިފި އެވެ.

މި އިމްތިހާނުގައި ރާއްޖޭގެ 201 ސްކޫލަކުން 5،100 އަށްވުރެ ގިނަ ދަރިވަރުން ބައިވެރިވެ އެވެ.

2008 ވަނަ އަހަރުން ފެށިގެން މުޅި ރާއްޖޭގައި ކުރިއަށް ގެންދެވޭ ނާލޯގައި މީގެ ކުރިން ބައިވެރިވެފައިވަނީ ހަމައެކަނި ކީ ސްޓޭޖް 1 އަދި 2 ނިންމާ ދަރިވަރުންނެވެ. ނަމަވެސް މި އަހަރު، ފުރަތަމަ ފަހަރަށް، ކީ ސްޓޭޖް 3 - ގްރޭޑް 7 އަދި 8 ނިންމާފައިވާ ދަރިވަރުން މި އިމްތިހާނުގައި ބައިވެރިވެ އެވެ.

މި އިމްތިހާނު ކުރިއަށްދާނީ ދެ ބުރަކަށް ބަހާލައިގެންނެވެ. މިއަދު ފެށި، ތިން ދުވަހަށް ކުރިއަށްދާ ފުރަތަމަ ބުރުގައި ހިމެނެނީ އިނގިރޭސި ބަސް، ހިސާބު އަދި ސައިންސްގެ އިމްތިހާނުތަކެވެ. ސެޕްޓެމްބަރު 2 އަދި 3 ގައި ބޭއްވުމަށް ހަމަޖެހިފައިވާ ދެ ވަނަ ބުރުގައި އިސްލާމް އަދި ދިވެހި ބަހުގެ އިމްތިހާނުތައް ކުރިއަށްދާނެ އެވެ.

ގިނަ ސުކޫލު ތަކުގައި ގްރޭޑް 9 ގެ ހުރިހާ ދަރިވަރުން މި އިމްތިހާނުގައި ބައިވެރިވާއިރު، އާބާދީ ބޮޑެތި ސުކޫލު ތަކުގައި ހޮވާލެވޭ ބައެއް ދަރިވަރުން ބައިވެރިވެ އެވެ.

ނާލޯގެ ދާއިރާ ފުޅާ ކުރުމުން ތައުލީމީ ނިޒާމާ ބެހޭ އަގުހުރި މައުލޫމާތު ލިބި، މުޅި ރާއްޖޭގައި ކިޔަވައިދިނުމާއި އުނގެނުމުގެ ފެންވަރު ރަނގަޅު ކުރުމަށް ކުރެވޭ މަސައްކަތް ތަކަށް އިތުރު އެހީތެރި ކަމެއް ލިބިގެންދާނެ އެވެ.

އެޑިއުކޭޝަން މިނިސްޓްރީ