އަންހެނުންގެ ފުރިހަމަ ބައިވެރިވުން ނެތި ގައުމެއް ބިނާ ނުކުރެވޭނެ: މެޑަމް ސާޖިދާ

އަންހެނުންގެ ފުރިހަމަ ބައިވެރިވުން ނެތި ގައުމެއް ބިނާކުރުމަކީ ކުރެވޭނެ ކަމެއް ނޫން ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެ އެވެ.

މޯލްޑިވްސް ގާލްގައިޑްސް އެސޯސިއޭޝަންގެ 2024 ވަނަ އަހަރުގެ އަހަރީ އާންމު ޖަލްސާ ޝަރަފުވެރިކޮށްދެއްވާ ވާހަކަފުޅު ދައްކަވަމުން އެ ކަމަނާ ވަނީ ގައުމު ބިނާކުރުމުގައި އަންހެނުންގެ ދައުރުގެ މުހިންމުކަން ފާހަގަ ކުރައްވާފަ އެވެ.

"އަންހެނުންގެ ފުރިހަމަ ބައިވެރިވުން ނެތި ގައުމެއް ބިނާކުރުމަކީ ކުރެވޭނެ ކަމެއް ނޫން، އަންހެނުންގެ ހަގީގީ ދައުރާ ނުލައި މުޖުތަމައެއް އިސްލާހު ކުރުމަކީ ވެސް، އެއް ގޮތަކަށް ވެސް ކާމިޔާބު ކުރެވޭނެ ކަމެއް ނޫން،" އެކަމަނާ ވިދާޅުވި އެވެ.

މި ޖަލްސާގައި އެ ކަމަނާ ވަނީ ދިވެހި އަންހެނުން ދީނީ ގޮތުން ހޭލުންތެރި ދީންވެރި ބަޔަކަށް ވުމަށް ބާރުއަޅުއްވައި ވާހަކަފުޅު ދައްކަވާފަ އެވެ. އަދި ދިވެހި އަންހެނުން ގައުމީ ރޫހު ދިރުވާ ބަޔަކަށް ވުމަށާއި، ޒަމާނުގެ އިލްމުތަކާ ފަންނު ތަކަށް ލޯހުޅުވިފައިވާ، އެ ކަންކަމަށް އަހުލުވެރި ބަޔަކަށް ވުމަށް އެ ކަމަނާ ބާރު އެޅުއްވި އެވެ. މީގެ އިތުރުން ވެސް، އިސްނަގައިގެން ހަރަކާތްތެރިވެ، އިސްރޯލެއް ދިވެހި މުޖުތަމައުގައި ދިވެހި އަންހެނުން އަދާ ކުރުން މުހިންމު ކަމުގައި އެ ކަމަނާ ވިދާޅުވި އެވެ.

މެޑަމް ސާޖިދާ ވިދާޅުވީ ގާލްގައިޑްސް ހަރަކާތަކީ ދިވެހީންގެ ދިރިއުޅުމުގެ ތެރޭގައި އޮތް ރަނގަޅު އިޖުތިމާއީ އެތައް ސިފަ ތަކެއް ރަސްމީ ގޮތެއްގައި ދަމަހައްޓައިދޭ ވިޔުގައެއް ކަމަށާއި، ދިވެހީންގެ ރީތި ސަގާފަތާއި އާދަކާދައަށް ދިރުންދޭ ބައިވެރިއެއް ކަމަށެވެ.

މި ޖަލްސާގައި މެޑަމް ސާޖިދާ ވަނީ މޯލްޑިވްސް ގާލްގައިޑްސްގެ ވެބްސައިޓް އިފްތިތާހު ކޮށްދެއްވާފަ އެވެ. އަދި އެކަމަނާ ވަނީ ގާލްގައިޑްސް އެސޯސިއޭޝަނަށް 20 އަހަރާއި 25 އަހަރުގެ ދިގު މުއްދަތަކަށް ހިދުމަތް ކުރެއްވި ފަރާތްތަކަށް ސެޓްފިކެޓާއި ބެޖު ހަވާލު ކޮށްދެއްވާފަ އެވެ.

މީގެއިތުރުން އެކަމަނާ ވަނީ، ޗީފް ކޮމިޝަނާ އާއި ޑެޕިއުޓީ ޗީފް ކޮމިޝަނާ، ޗީފް ކޮމިޝަނާ އަދި ޑެޕިއުޓީ ޗީފް ކޮމިޝަނާ ކަމުގެ ޓާމް ނިންމެވުމާ ގުޅިގެން ދެއްވާ ސެޓްފިކެޓް، ބެޖު އަދި ސްކާފް ހަވާލު ކޮށްދެއްވާފަ އެވެ. އަދި، އަލަށް ޗީފް ކޮމިޝަނާގެ މަގާމާ ހަވާލުވެވަޑައިގެންނެވި އައިޝަތު ނަޝީދާއަށް މެޑަމް ވަނީ ސެޓްފިކެޓް ހަވާލު ކޮށްދެއްވާފަ އެވެ.